Krydd í tilveruna

Hver hefur ekki áhuga á því að fá dálítið krydd í tilveruna? Kryddjurtir fást í miklu úrvali í gróðrarstöðvum og er nokkuð algengt að fólk þjáist af töluverðum valkvíða þegar það stendur frammi fyrir kryddjurtastóðinu.

Graslaukur í fullum skrúða.

Þessar bragðgóðu plöntur eru ýmist ein- eða tvíærar eða fjölærar og misharðgerðar við íslenskar aðstæður en hver og einn ætti að geta fundið plöntur sem henta bæði bragðlaukum og vaxtarskilyrðum heima við. Fjölærar kryddjurtir er sniðugt að gróðursetja í og við matjurtagarðinn þar sem þær standa áfram næstu ár. Í þessum flokki eru til dæmis graslaukur, blóðberg, piparmynta, skessujurt og kjarrmynta. Ein- eða tvíærar kryddjurtir, eins og kóríander, steinselja og dill má vissulega gróðursetja í matjurtagarðinn en einnig er sniðugt að raða saman nokkrum lykiltegundum í ker og/eða potta og hafa við höndina nálægt grillinu eða eldhúsglugganum, þá er fljótlegt að nálgast þær í matseldina.

Almennt vilja þessar kryddtegundir sólríkan vaxtarstað og frjósaman jarðveg og ef þær eru ræktaðar í pottum yfir sumarið er nauðsynlegt að fylgjast vel með vökvun, jafnvel vökva þær með blómaáburði einu sinni til tvisvar í viku. Basilika er gjarnan seld í gróðrarstöðvum en hún er kuldaskræfa og hentar því best að hafa hana í gróðurhúsi eða inni í eldhúsi á sæmilega björtum stað.