Jólin eru að koma
Nú fer að líða að hátíð ljóssins og jólasveinanna og því ekki seinna vænna að skella sér í sparifötin og kíkja á hvað áhugamannaleikfélögin hafa upp á að bjóða.
Nýverið frumsýndu liðsmenn Freyvangsleikhússins verkið Jólaköttinn eftir Sigurbjörgu Ingólfsdóttur og hlaut það bæði lof og hlátrasköll frumsýningargesta. Næstu sýningar verða 6., 13., 14. og 20. desember, allar klukkan 13, en aukasýning seinni partinn þann 13. desember klukkan 15.30.
Litli leikklúbburinn á Ísafirði lætur líka að sér kveða en þau tóku sig til og endurfrumsýna nú jólaleikritið Lápur, Skrápur og jólaskapið eftir Snæbjörn Ragnarsson. Sýningar fara fram í Edinborgarhúsinu og segir formaðurinn, Gunnar Ingi Hrafnsson, að ákveðið hafi verið að hafa lifandi tónlist í uppfærslunni sem gerir sýninguna enn hressilegri. Einungis eru tvær sýningar eftir, þann 6. desember kl. 13 og 7. desember kl. 11 - þannig það fer hver að verða síðastur að næla sér í miða. Þá má finna á vefsíðunni midix.is en frekari upplýsingar eru á vefsíðu Litla leikklúbbsins, www.litlileik.is.
Leikfélag Vestmannaeyja hefur á fjölunum ævintýrasöngleikinn sem allir þekkja, Skilaboðaskjóðuna eftir Þorvald Þorsteinsson. Næstu sýningar verða helgina 6. og 7. desember, tvær sýningar á laugardeginum kl. 13 og 16.30 en klukkan 15 á sunnudeginum. Síðasta sýning verður svo þann 13. desember klukkan 13. Miða má nálgast í síma 852 1940 eða með skilaboðum á Facebook-síðu Leikfélags Vestmannaeyja. Skemmtið ykkur vel!
