Jólakveðja og bóluefnasprauta teiknuð í hafflöt og himinhvolf
Það eru fleiri en skipverjar á björgunarskipinu Gísla Jón frá Ísafirði sem hafa fengið þá hugdettu að teikna skemmtilegar myndir með aðstoð GPS punkta í leiðsögukerfum. Svipaðri hugmynd skaut nefnilega upp í kollinum á 20 ára gömlum þýskum orrustuflugmanni á dögunum.
Jólatré teiknað fyrir Landhelgisgæsluna með GPS ferli björgunarskipsins Gísla Jóns frá Ísafirði á Ísafjarðardjúpi.
Áhöfnin að Gísla Jóns teiknaði jólatré á hafflötinn í Ísafjarðardjúpi og sendu Landhelgisgæslunni með því jólakveðju. Þýski flugmaðurinn Samy Kramer teiknaði aftur á móti risastóra sprautu á himinhvolfið í 200 kílómetra flugi nálægt Bodensee í Suður-Þýskalandi. Kramer tók á loft á vélinni D-ENIG frá herflugvelli í Friedrichshafen 23. desember og sprautulaga flugleið hans birtist á vefsíðu flightradar24. Gerði hann þetta til að minna fólk á upphaf bólusetningarherferðar COVID-19 í Evrópu.
„Það eru enn tiltölulega margir sem eru á móti bólusetningunni og aðgerð mín getur verið þeim áminning um að hugsa um efnið, til að koma hlutunum í gang“, sagði Kramer við sjónvarpsstöðina Reuters sunnudaginn 27. desember.
„Kannski var það líka svolítið tákn um gleði, vegna þess að flugiðnaðurinn hefur orðið fyrir talsverðum höggum af heimsfaraldrinum“, sagði Kramer. Þýskaland hóf opinberlega COVID-19 bólusetningarherferð sína á sunnudag, þó nokkur ríki innan ESB vildu ekki hlíða fyrirmælum yfirvalda í Brussel og hófu bólusetningar fyrr. Alríkisstjórnin í Þýskalandi ætlar að dreifa meira en 1,3 milljón bóluefnisskömmtum til sveitarfélaga í lok þessa árs og um 700.000 á viku frá janúar.
