Íslenska skyrið vann með glæsibrag

Höfundur: Snorri Sigurðsson

Alþjóðlega matvælakeppnin International FOOD contest 2017 var haldin 3.-5. október sl. í Herning í Danmörku. Keppni þessi, sem haldin er árlega, byggir að mestu á því að afurðastöðvar í mjólkuriðnaði senda vörur sínar inn og eru þær dæmdar af sérstökum dómurum sem meta ýmsa þætti eins og bragðgæði, áferð, útlit og margt fleira sem er tekið inn í mat dómaranna.

Í ár tóku 150 dómarar að sér að meta þær ótal mjólkurvörur sem sendar voru inn til keppninnar, en alls var hægt að senda inn mjólkurvörur í á fimmta tug ólíkra flokka af ostum, smjöri, jógúrti, drykkjarvörum og öðrum neysluvörum. Þá var einnig keppt í öðrum flokkum matvæla og tóku um 1.200 mismunandi tegundir og gerðir matvæla þátt í keppninni í ár.

Sá frábæri árangur náðist að íslenskt skyr vann heiðursverðlaunin sjálf í neysluvöruflokknum og er sá árangur einstakur enda MS þarna að etja kappi við stórfyrirtæki í mjólkurvinnslu eins og t.d. norður-evrópska afurðafélagið Arla, sem er um 100 sinnum stærra afurðafélag en MS. Þetta er í annað skipti sem MS vinnur þessi verðlaun en árið 2012 vann félagið með kókómjólkina að vopni, en að þessu sinni var það Ísey skyr með bökuðum eplum frá MS á Selfossi sem vann.

Þrír meginflokkar

Í keppninni er mjólkurvörum skipt niður í þrjá ólíka meginflokka mjólkurvara, þ.e. í osta, smjör og neysluvörur. Innan hvers meginflokks eru svo mismunandi margir undirflokkar en alls voru á fimmta tug undirflokka í keppninni í ár. Hinar 1.200 mjólkurvörur voru svo flokkaðar niður í þessa ótal undirflokka og kepptu þær svo innbyrðis í hverjum flokki. Í raun gátu margar mjólkurvörur innan hvers flokks hlotið gullverðlaun, en reglur keppninnar eru þannig að hverri matvöru eru gefin stig eftir sérstökum reglum keppninnar og svo eru stigin talin saman og vörunum innan hvers flokks raðað upp. Efstu 10% hljóta gullverðlaun í viðkomandi flokki, þá fá næstu 20% silfurverðlaun og næstu 33% bronsverðlaun. Hver afurðastöð má svo, kjósi hún það, skarta þessum verðlaunum við markaðssetningu vörunnar.

Skyrið vann neysluvöruflokkinn

Bestu mjólkurvörurnar í hverjum undirflokki keppa svo um sigurinn í einum af hinum þremur meginflokkum mjólkurvaranna og sem fyrr segir stóð íslenska skyrið frá MS á Selfossi þar efst á blaði í flokki almennra neysluvara. Í öðrum flokkum urðu aðrar afurðastöðvar hlutskarpastar og vann t.d. Taulov afurðastöðin, sem er í eigu Arla, ostakeppnina með hraðþroskaða ostinn sinn Höhlenkäse Light í sneiðum og afurðastöðin í Holstebro, sem einnig er í eigu Arla, vann svo smjörkeppnina með ósaltað LURPAK smjör fyrir arabískan markað. Það má eiginlega segja að Holstebro afurðastöð Arla sé fastur áskrifandi að smjörverðlaununum enda afar rík smjörgerðarhefð þar og hafa ekki aðrar afurðastöðvar náð þessum verðlaunum til sín um hríð.

Skyr framleitt víða

Í dag er skyr framleitt í mörgum löndum utan Íslands og er skyr sú mjólkurafurð sem vex einna örast í nágrannalöndum okkar og er t.d. ein allra vinsælasta mjólkurvaran sem seld er í Danmörku. Skyr þetta er ekki nema í litlum mæli verið að framleiða eftir uppskrift og með rétthafagreiðslu til MS og er þorri þess framleitt af afurðastöðvum sem hafa prófað sig áfram með að þróa skyr. Þrátt fyrir að margar þessara afurðastöðva úti í heimi hafi yfir gríðarlegum upphæðum að ráða í þróunarstarf sitt, þá sést skýrt af þessari niðurstöðu International FOOD contest að íslenskir mjólkurfræðingar hafa enn töluvert forskot á kollega sína í öðrum löndum, a.m.k. þegar horft er til skyrgerðar.