Innviðaskuld í Öræfum
Íbúða- og þjónustuskortur er í Öræfum að sögn íbúa sem skorar á sveitarstjórn Hornafjarðar og ríkisstjórn að blása til sóknar fyrir sístækkandi samfélag þar.
Íbúafjöldi Öræfa hefur margfaldast á áratug. Árið 2010 voru þeir tæplega 90 talsins en telja í dag 235 að því er fram kemur í aðsendri grein Írisar Ragnarsdóttur Pedersen fjallaleiðsögumanns, en hún er búsett í Svínafelli í Öræfum. Þrátt fyrir íbúafjöldann sé ekki að finna matvöruverslun, heilsugæslu eða sundlaug eins og í mörgum byggðarlögum af sömu stærðargráðu.
„Víða um landið eru byggðarlög með 200–300 íbúum með gott þjónustustig, s.s. Laugarvatn, Bíldudalur, Tálknafjörður, Búðardalur og Hólmavík. Á öllum þessum stöðum er hægt að komast í sund eða heitan pott, stunda íþróttir í íþróttahúsi, fá sendan pakka í póstbox, komast til læknis á innan við 30 mínútum, kaupa í matinn og leigja íbúð. En íbúar Öræfa fara á mis við öll þessi almennu lífsgæði. Er það einungis vegna þess að sveitin er dreifbýli en ekki byggðarkjarni? Eða hefur sveitarfélagið gleymt að sinna íbúum Öræfa? Hefur sveitarfélagið gleymt að sinna tæplega 15% íbúa sinna?“ spyr Íris meðal annars í greininni.
Hún bendir þar á að hartnær fjörutíu ár séu síðan síðasta opinbera bygging í Öræfum var byggð. „Í Öræfum sárvantar mannaðan sjúkrabíl og heilbrigðisþjónustu sem hlýtur að teljast til almennra mannréttinda allra á Íslandi. Enginn á að þurfa að bíða í klukkustund eftir sérhæfðri aðstoð. Og að lokum vantar hér aðstöðu til íþróttaiðkunar innandyra.“
– Sjá nánar á síðu 48. í nýjasta tölublaði Bændablaðsins
