Innleiða þarf vistkerfisnálgun
Tímabært þykir að innleiða vistkerfisnálgun á Íslandi með skipulögðum hætti. Fræðsla og menntun þurfi að fela í sér samtal allra aðila og reynslu og þekkingu framkvæmdaaðila, þ.m.t. bænda.
Matvælaráðuneytið fól BIODICE, samstarfsvettvangi um líffræðilega fjölbreytni, að taka saman helstu niðurstöður og sjónarmið sem fram komu á málþingi um vistkerfisnálgun í haust. Einnig var óskað eftir tillögur um þau lykilatriði sem eru grundvöllur þess að vistkerfisnálgun sé viðhöfð fyrir mismunandi framleiðslugreinar, sem og aðgerðir við innleiðingu hennar og beitingu.
Segir í samantekt BIODICE að þótt góður vilji hafi verið til að stunda auðlindanýtingu í anda vistkerfisnálgunar á ýmsum sviðum hérlendis standi Íslendingar frammi fyrir margvíslegum alvarlegum vandamálum tengdum ósjálfbærri nýtingu náttúruauðlinda, hnignun líffræðilegrar fjölbreytni, framandi ágengum tegundum, röskum búsvæða, mengun og áhrifum loftslagsbreytinga. Allt séu þetta atriði sem eru vel þekkt um heim allan og tengjast ekki síst matvælaframleiðslu á einn eða annan hátt.
Sameinuðu þjóðirnar lýsa þessari stöðu mála sem hnattrænu neyðarástandi, að úrlausn þess krefjist viðamikilla hugarfarsbreytinga og breyttra samræmdra viðbragða sem séu skoðuð samhliða öðrum lykilmálefnum á sviði umhverfis- og sjálfbærnimála. Nauðsynlegt sé að staðbundnar nálganir séu samræmdar og settar í alþjóðlegt samhengi, svo sem ábyrgð Íslands á lífverum sem ferðast um heiminn eins og farfuglum og hvölum sem byggja afkomu sína á búsvæðum hérlendis.
Heilt yfir sé staða þekkingar á lífverum og vistkerfum hérlendis of lítil og brotakennd og þörf sé á stórátaki í grunnrannsóknum og vöktunarrannsóknum
