Veiðin hefur gengið vel á Urriðasvæðinu í Þjórsá

,,Staðan við Urriðafossinn er mjög góð og  rosalega mikill fiskur að ganga,“ sagði Harpa Hlín Þórðardóttir, þegar við spurðum  um veiðina á Urriðafossi í Þjórsánni. Veiðin þar hefur gengið ævintýralega vel það sem af er veiðitímanum.

 

,,Jú, við vissum að veiðin yrði góð, en óraði ekki fyrir að hún myndi byrja svona vel. Fiskur er að ganga fyrr en í meðalári. Það eru komnir um 60 laxar en það er hóflegur kvóti svo meirihluti þeirra hefur fengið líf. Við erum búin að vera í  vangaveltum með landeigendum í töluverðan tíma um að hefja stangveiði í Urriðafossi, vildum stíga létt til jarðar og vinna þetta rólega og kynnast svæðinu sem hefur lítið verið veitt á stöng.  Það verður að segjast að viðbrögð veiðiheimsins komu okkur mest á óvart og greinilega margir veiðimenn að kynnast svæðinu.  

 

Við erum mjög spennt að þróa þessa hugmynd áfram með landeigendum. Landeigendur þekkja náttúrlega hvern krók og kima á svæðinu og vissu mun betur en við hvernig þetta gæti orðið og sjá verðmætin í því að breyta veið­inni í Urriðafossi úr netaveiði í stangveiði. Við höfðum áætlað u.þ.b. fimm ár fyrir þessar breytingar og að byggja upp svæðið fyrir stangveiði en miðað við viðtökurnar þá gæti það tekið mun skemmri tíma,“ sagði Harpa enn fremur.