Stóri urriðinn hefur verið að gefa sig

,,Það var brjálað rok og mígandi rigning, algjört rugl að vera úti í svona veðri,“ sagði Árni Kristinn Skúlason en hann hefur veitt töluvert í vorbyrjun og var á Þingvöllum fyrir fáum  dögum þegar aðrir voru bara heima hjá sér. En stóri urriðinn hefur verið að gefa sig og kannski mest á ION-svæðinu.

 

,,Það lægði í örfáar sekúndur og þá náði ég flugunni góða 20 metra út, þá lét ég fluguna sökkva vel og strippaði hratt inn. Mjög  fljótt strekktist vel á línunni og rauk línan út með látum. 

 

Eftir góða 60 metra roku stoppaði fiskurinn og gat ég togað hann nær mér, þá fann ég hve stór fiskurinn í raun og veru var, ekkert smá þungt kvikindi og stöngin í keng. 

 

Fiskurinn sýndi engin merki um þreytu og rauk út aftur og aftur þar til hann gaf sig á endanum, þá eftir góðan hálftíma á!  Ég tók mjög fast á honum, bremsan í botni, en það náði ekki að stöðva hann.

Fiskurinn reyndist 91 cm og 9 kg, mældur og vigtaður,“ sagði Árni við baráttuna á Þingvöllum.

 

– Hvað er að frétta úr Brúaránni?

 

,,Vorveiðin í Brúará í landi Sels hefur verið ágæt, Unnar Örn, frændi minn, fór núna um daginn og fékk nokkra fína urriða. 

 

Áin hefur verið frekar vatnsmikil og erfið en alltaf hægt að gera góða veiði. Núna er að hlýna og bleikjan ætti að fara að gefa sig,“ segir Árni Kristinn, sem eyðir miklum tíma við ána enda á hann heima þar rétt hjá henni. Og segir veiðimönnum þar til um veiðina stóran hluta sumars.