Hvernig get ég vitað meira?
Matvælaframleiðsla byggir á fjölmörgum þáttum og samspili þeirra á milli. Það þarf þekkingu og reynslu til að ná að árangri, og mikið af hvoru tveggja eigi árangurinn að vera góður. En einn maður getur ekki vitað allt.
Bændur þekkja sitt land best en þó getur verið mjög gagnlegt að vita meira. Með því að láta taka jarðvegssýni er hægt að afla upplýsinga sem geta gefið skýringar á því hvernig hefur gengið og til að undirbúa framtíðina. Gamla góða sýrustigið (pH) getur útskýrt margt ef það er of lágt. Þá hörfar sáðgresið, áborin næringarefni nýtast ekki vel og jarðvegslífið er frekar ósátt. Jarðvegssýni geta líka sagt okkur um stöðu aðgengilegra næringarefna svo sem N, P og K. Svo getum við séð hvort mikið eða lítið er af heildar N í jarðveginum og hvort jarðvegurinn er eðlis-frjósamur eða ekki, allt mikilvægir þættir t.d. við gerð áburðaráætlunar.
Tíminn líður svo hratt að áburðaráætlanirnar eru ekki svo langt undan og það er alltaf betra að vita með sýrustigið, jafnvel þó að það sé of lágt í mörgum túnum. Það er nefnilega þetta með undirbúninginn og forgangsröðunina, það er betra að skoða það í tíma og nú er rétti tíminn til að taka jarðvegssýni. Það er gott að taka jarðvegssýni á 5 til 8 ára fresti. Hægt er að sjá inn í Jörð úr hvaða spildum hafa verið tekin jarðvegssýni, og þá hvenær. Það er nefnilega þetta með tímann, það sem mér fannst vera í fyrra var víst fyrir þremur árum.
Það er svo margt sem þarf að vita og ekki gott að vita með það sem er óþekkt, fyrr en það er kannað. RML býður upp á jarðvegssýnatöku og túlkun á niðurstöðum auk áburðaráætlana þegar að því kemur. Hægt er að panta sýnatöku á heimasíðu RML með því að smella á hnapp merktan „Panta hey-/ jarðvegssýnatöku“.
