Hópsýking á Rangárvöllum
Nokkur fjöldi ferðafólks, sem átti leið um Rjúpnavelli á Rangárvöllum á undanförnum vikum, veiktist af iðrasýkingu og beinist grunur að menguðu neysluvatni.
Í umfjöllun á vef Matvælastofnunar um málið kemur fram að tilkynning hafi borist Heilbrigðiseftirliti Suðurlands um að einstaklingar sem höfðu gist á Rangárvöllum dagana 24.–26. júlí hefðu veikst af iðrasýkingu. Farið var samdægurs í eftirlitsheimsókn og vatnssýni tekin til rannsókna.
„Fyrstu niðurstöður þessara rannsókna lágu fyrir föstudaginn 9. ágúst og bentu til E. coli- mengunar í vatni. Í kjölfarið fengu staðarhaldarar tilmæli um að sjóða allt neysluvatn og að upplýsa gesti um mögulega mengun. Næsta dag barst staðfesting þess að E. coli hafi greinst í vatnssýnum en þó í litlu magni. Þessar niðurstöður benda til mögulegrar mengunar í neysluvatni á svæðinu sem kallar á frekari rannsóknir og aðgerðir,“ segir í umfjöllun Matvælastofnunar.
Í umfjöllun Ríkisútvarpsins 13. ágúst var fjallað um málið og rætt við einn af eigendum Rjúpnavalla. Sagðist eigandinn ekki hafa vitað af mögulegri mengun fyrr en Heilbrigðiseftirlit Suðurlands kom á staðinn til sýnatöku og því hafði gestum staðarins ekki verið gert viðvart um að neysluvatnið gæti verið óhæft til drykkjar.
Matvælastofnun og sóttvarnalæknir voru upplýst um málið mánudaginn 12. ágúst. „Þriðjudaginn 13. ágúst var boðað til fundar stýrihóps í samræmi við verklag við rannsóknir á vatns- eða matarbornum hópsýkingum. Á þeim fundi voru fulltrúar Heilbrigðiseftirlits Suðurlands, Matvælastofnunar, sóttvarnalæknis, umdæmis-/ svæðislæknar Suðurlands og sýkla- og veirufræðideildar Landspítalans. Á fundinum kom fram að um nokkurn fjölda fólks virðist vera að ræða sem voru á ferðalagi á þessu landsvæði en uppruni og orsök veikindanna hafa ekki verið staðfest. Upplýsingasöfnun var skipulögð með það að markmiði að kortleggja umfang málsins, þ.m.t. fjölda og ferðir þeirra sem veiktust. Heilsugæslan skipuleggur sýnatökur frá einstaklingum sem tengjast málinu,“ segir enn fremur í umfjöllun Matvælastofnunar.
