Hjúkrunarfræðinemi hlaut 500.000 króna styrk úr Snorrasjóði

Hinn 29. desember fór fram úthlutun í Múlaþingi úr svonefndum Snorrasjóði en þetta var í sjötta sinn, sem styrkur er veittur úr sjóðnum.

Sjóðurinn var stofnaður árið 2019 að frumkvæði Gunnþóru Gísladóttur frá Papey til minningar um Snorra Gíslason, bróður hennar, en tilgangur sjóðsins er að styrkja ungt fólk úr Djúpavogshreppi til náms. Úr sjóðnum eru veittar 500.000 krónur einum nemanda einu sinni á ári. Að þessu sinni var það Hafrún Alexía Ægisdóttir, sem hlaut námsstyrkinn en hún stundar nám í hjúkrunarfræði við Háskóla Íslands. Hafrún er vel að styrknum komin og er alveg ákveðin í að snúa til baka eftir nám til Djúpavogs.

Hagleiksmaðurinn Snorri

Fyrir þá sem ekki þekkja til þá fæddist Snorri Gíslason frá Papey 4. ágúst 1915. Hann var mikill hagleiksmaður og byrjaði snemma að smíða ýmsa muni svo sem húsgögn og ýmislegt smálegt. Snorri fékkst lengi vel við að smíða líkön af bátum og voru þeir eftirsóttir vegna þess hversu vandaðir þeir voru. Fínleiki bátanna vakti athygli en allt var handunnið, möstrin mótuð með hefli og sandpappír og voru bátarnir nákvæm eftirmynd af bátum í fullri stærð.

Vindrella, sólarrafhlaða og hleðslustöð rafmagns

Upp úr 1940 tók Snorri til við að setja upp vindrellu í Papey og setti hann svo upp hleðslustöð og lagði rafmagn í húsið. Með þessari framkvæmd varð Papey eitt af fyrstu húsunum á Djúpavogi, sem fékk rafmagn. Snorri fluttist í land árið 1949 þá 34 ára gamall og settist að í húsi sem ber sama nafn og bærinn í Papey, Bjarg.

Seinna meir festi hann sólarrafhlöðu utan á húsið þar sem hann safnaði rafmagni til heimilisnota. Snorra féll sjaldan verk úr hendi og hann var að vinna við endurbætur á húsinu sínu eða smíða skipslíkön fram á síðustu ár. Snorri lést á hjúkrunarheimilinu á Höfn, 29. júní 2014, á nítugasta og níunda aldursári.