Hilmir Íslandsmeistari í skák

Hilmir Freyr Heimisson varð á dögunum Íslandsmeistari í skák í fyrsta sinn. Hilmir er vel að sigrinum kominn. Hann er tveimur árum yngri en greinarhöfundur og það hefur verið gaman, en stundum erfitt, að fylgjast með skákferli hans. Stuttur ferillinn hefur einkennst af miklum sveiflum. En á sama tíma og sveiflurnar geta verið langt niður, þá geta þær líka verið upp í hæstu hæðir. Í landsliðsflokki tefldu tíu skákmenn við hverja aðra og náði Hilmir heilum átta vinningum úr skákunum níu. Þetta hefði undir venjulegum kringumstæðum dugað fyrir stórmeistaraáfanga, en því miður voru meðalstig andstæðinga of lág. Það dugði ekki fráfarandi Íslandsmeistara, Vigni Vatnari Stefánssyni, að fá 7½  vinning sem undirstrikar hve góður árangur Hilmis var. Vignir var sá eini sem vann Hilmi, en gerði hins vegar þrjú jafntefli. Stórmeistarinn og þrettánfaldi Íslandsmeistarinn Hannes Hlífar Stefánsson fékk 3. sætið með 6½ vinning. 

Teflt var við frábærar aðstæður í nýjum sal í íþróttahúsinu Miðgarði í Garðabæ. Þar er einnig Taflfélag Garðabæjar til húsa. Salurinn var prufukeyrður í vor þegar Kragamótið í skólaskák var haldið, og þá kom í ljós að hljóðvist var frábært. Í hliðarsal bakvið gler hefði verið hægt að öskra, og skákmenn fyndu ekkert fyrir því! Eldhúskrókur, sjónvarp og sófi í horninu þar sem gestir gátu fylgst með skákunum beint, allt til alls. 

 Greinarhöfundur er ánægður með Skákþing Íslands en sá fyrir sér enn stærri skákhátíð, í sal sem þessum. Áhugasamir geta kynnt sér hugmynd um nýjan meistaraflokk, sem færi fram helst samhliða landsliðsflokki að ári, fái tillagan brautargengi á aðalfundi Skáksambandsins. Það á allt eftir að koma í ljós, og áhugasamir geta kynnt sér málið og aðrar tillögur, á skák.is! Á sunnudaginn hefst áskorendaflokkur Skákþings Íslands, en tvö efstu sætin úr mótinu gefa rétt til þátttöku í landsliðsflokki að ári. Mótið verður í haldið í Taflfélagi Reykjavíkur og teflt verður dag eftir dag í heila viku, og hefjast skákirnar á virkum dögum klukkan 18:30. Búast má við Gevalia kaffi ásamt g-mjólk, og hvítum dúkum á borðum. Það er virðingarvert að komast í sjálfan landsliðsflokk, og ég hvet skákmenn til að láta á það reyna, miði er möguleiki!

Ef lesendur Bændablaðsins luma á áhugaverðum skákum geta þeir haft samband.

Umsjón: Gauti Páll Jónsson

gauti.pj[hjá]hotmail.com