Heildarkostnaður við girðingar að minnsta kosti um 360 milljónir

Heildarkostnaður opinberra aðila við girðingar er talinn vera að minnsta kosti um 360 milljónir króna á hverju ári, en að líkindum er sá kostnaður vanáætlaður því ekki bárust gögn frá öllum þeim sem til var leitað. Þetta kemur fram í skýrslu starfshóps um umbætur og hagræðingar vegna girðinga í eigu hins opinbera, en hópurinn hefur skilað umhverfis- og auðlindaráðherra skýrslunni að því er fram kemur í frétt á vef stjórnarráðsins.

Í skýrslunni eru m.a. birtar tölur um umfang girðinga á vegum opinberra aðila, stofnana og sveitarfélaga. Heildarkostnaður opinberra aðila við girðingar á árabilinu 2015 til 2020 er 2.149 milljónir, eða um 358 milljónir á ári.

Auk talna um heildarkostnað birtir hópurinn þar greiningu á helstu hagsmunum, áskorunum og tækifærum til úrbóta við núverandi aðstæður s.s. með tilliti til kostnaðar, gróðurverndar, ræktunar, dýraverndar og umferðaröryggis.

Í skýrslunni kemur fram að starfshópurinn telji mikilvægt að tengja saman ólíka hagsmuni, t.d. sauðfjárbúskap, landvernd, ferðaþjónustu, umferðaröryggi og skógrækt. Á vissum stöðum geti falist tækifæri í því að sameinast um að girða ákveðin landsvæði af til beitar. Annars staðar geti tækifæri falist í því að banna lausagöngu búfjár en styrkja eigendur búfjár jafnframt til þess að girða búfé sitt af.

Vilja kanna ávinning af afgirtum hólfum

Starfshópurinn leggur fram ýmsar tillögur í skýrslu sinni, svo sem að tekið verði saman eignasafn girðinga opinberra aðila, unninn verði sameiginlegur gagnagrunnur opinberra aðila um girðingar og honum deilt í vefsjá og að lög og reglugerðir sem gilda um girðingar og ábyrgð á þeim verði samræmd og endurskoðuð. Þá er einnig lagt til að unnin verði þarfagreining á girðingum eftir landshlutum, lög sem gildi um búfjárhald verði samræmd og endurskoðuð og samspil búvörusamninga og girðinga verði kortlagt. Loks er lagt til að ávinningur þess að vera með afgirt hólf eða landsvæði verði kannaður, en til þess þurfi að tengja saman ólíka hagsmunaaðila og finna sameiginlegar lausnir með bætta landnýtingu að leiðarljósi.

Starfshópurinn starfar áfram og vinnur að gerð tillagna að verkefnum sem leitt geta til ávinnings og byggjast á samráði við þá sem best þekkja til aðstæðna á hverju svæði. Gert er ráð fyrir að slíkar tillögur verði kynntar ráðuneytum umhverfis- og auðlindamála, landbúnaðar- og samgöngumála ásamt sveitarstjórnum eigi síðar en 1. október.