Hækkanir á aðföngum og kjaramál voru til umræðu á Búnaðarþingi fyrir tíu árum
Í 5. tölublaði 11. mars árið 2008 var á forsíðu fjallað um Búnaðarþing, sem þá var nýafstaðið.
Í umfjöllun um þingið kom fram að umræður hefðu að verulegu leyti snúist um þær hækkanir sem orðið höfðu á aðföngum til landbúnaðarins og viðbrögð við þeim.
Við umræðuna um þessar hækkanir blönduðust umræður um kjaramál og ályktaði þingið um að afurðaverð til bænda yrði að hækka:
Eins og Bændasamtök Íslands hafa bent á síðustu mánuði hefur rekstrarkostnaður í landbúnaði hækkað verulega um heim allan. Hliðstæð þróun blasir við hér og rekstrarútgjöld íslenskra bænda hafa á síðustu vikum og mánuðum hækkað meira en áður hefur þekkst. Þessar hækkanir eru að mestu leyti hluti af alþjóðlegri þróun sem nú leiðir hvarvetna til hækkandi matvælaverðs. Sem dæmi má nefna gríðarlegar hækkanir á fóðurverði, sáðvörum, olíu og ekki síst á áburð- arverði sem hefur hækkað sem næst 80%. Þá hefur orðið óheyrileg hækkun á fjármagnskostnaði sem á sér bæði uppruna í alvarlegu ástandi á fjármálamörkuðum heimsins og stöðu efnahagsmála á Íslandi. Afleiðingar þessara hækkana eru þær að rekstrarforsendur í íslenskum landbúnaði eru brostnar að óbreyttu afurðaverði. Þessi staða er ekki aðeins alvarleg fyrir bændur, heldur ógnar hún einnig aðgengi íslenskra neytenda að gæðamatvælum á sanngjörnu verði. Framtíð íslensks landbúnaðar og þar með mataröryggi þjóðarinnar, er undir því komið að bændur standi af sér núverandi þrengingar. Við þessar aðstæður leggur Búnaðarþing 2008 áherslu á að afurðaverð til bænda verður að hækka í samræmi við aukinn tilkostnað. Að öðru leyti leggur þingið áherslu á eftirfarandi: 1. Tollar á innfluttar landbúnaðarvörur verði ekki lækkaðir. 2. Samkvæmt gildandi lögum fellur útflutningsskylda kindakjöts niður 1. júní 2009. Lögð er áhersla á að núverandi skipan haldist og að útflutningsskyldunni verði beitt áfram. 3. Til að draga úr áhrifum gríð- arlegrar hækkunar á áburð- arverði, leggi ríkissjóður fram fjármagn til að mæta þessum kostnaðarauka árið 2008 og stuðli þannig að lægra verði til neytenda. 4. Gjöld á innfluttar fóðurblöndur verði felld niður. 5. Beita þarf áfram öllum tiltækum faglegum leiðum til að lækka framleiðslukostnað íslenskra búvara,“ sagði í ályktun þingsins.
Hægt er að sjá nánari umfjöllun blaðsins um Búnaðarþing 2008 á blaðsíðum 2 og 4–12 á vefnum Timarit.is.
