Glæsileg vörn
Við sögðum í síðasta briddsþætti frá snjallri sagnvenju á Norðurlandamóti briddsspilara 65 ára og eldri sem fram fór í netheimum fyrir skemmstu.
Þorlákur Jónsson var meðal þeirra sem skipuðu lið Íslands og hlaut bronsið á Norðurlandamótinu. Hann landaði ásamt félögum sínum í íslenska landsliðinu heimsmeistaratitli í bridds árið 1991 í Japan. Það afrek gleymist aldrei. Í Yokohama nutu Þorlákur og makker hans á þeim tíma, Guðmundur Páll Arnarson, þess að búa yfir beittri sagntækni ásamt hinum tveimur íslensku pörunum, þeir notuðu hindranir af meiri þrótti en sést hafði og bjuggu yfir fjöldjöflum í vopnabúrinu sem rugluðu margan andstæðinginn í ríminu.
En vörnin skiptir alltaf miklu máli og vörnina spilar Þorlákur enn eins og kóngur líkt og þeir sem fylgdust með NM heldri spilara á dögunum sáu í beinni útsendingu á Real Bridds.
Þorlákur sat í vestur og átti út gegn fjórum hjörtum án þess að AV kæmu inn á sagnir. Öll útspil önnur en tígull hefðu gefið samninginn og Þorlákur fann að spila út tígli. Makker Þorláks, Sverrir Ármannsson, drap á einspilið og spilaði spaða um hæl. Sagnhafi reyndi svíninguna en kóngur Þorláks átti slaginn og hélt svo Þorlákur áfram með spaða. Þegar hann komst inn á trompásinn gaf hann makker sínum stungu, glæsileg vörn og talan í AV.
MFS: Monrad-keppni hjá BR
„Þetta eru vel æfðir menn,“ segir Sigurbjörn Haraldsson, landsliðsmaður í bridds, um spilarana í sveit Málningar sem unnu fyrsta keppniskvöldið í þriggja kvölda sveitakeppni sem spiluð er nú með Monrad-sniði í einum merkilegasta briddsklúbbi landsins, Bridgefélagi Reykjavíkur. Uppeldisstöð margra af sterkustu spilurum landsins í áranna rás.
Fjöldi briddsfélaga stendur fyrir vikulegum mótum um allt land. Eru nýir og óvanir spilarar velkomnir. Sú tíð er löngu liðin að nýliðar fái misjafnar móttökur. Bridds er spil fyrir alla, byrjendur sem lengra komna. Fyrst og fremst er bridds hugaríþrótt fyrir fólk sem vill hafa gaman af því að hitta annað fólk og brjóta heilann í leiðinni svo um munar.
