Fyrstu sumarblómunum sáð í febrúar

Starfsmenn Ræktunarstöðvar Reykjavíkur í Fossvogi eru farnir að undirbúa sumarið. Nánast öll sumarblóm og tré sem ræktuð eru á vegum borgarinnar koma frá þessari einu ræktunarstöð.

Þann 11. febrúar var fyrstu fræjum sumarblóma komandi sumars komið í mold. Oddrún Sigurðardóttir, yfirverkstjóri og garðyrkjufræðingur, segir mikinn annatíma að hefjast, sem ljúki ekki fyrr en um næstu jól.

Ræktunarstöð Reykjavíkur í Fossvogi er rekin af borginni og eru sjö starfsmenn sem vinna þar árið um kring. „Það sem við gerum er að rækta sumarblóm, tré og runna, ásamt því að vera með einhverja fjölæringa líka, einungis fyrir Reykjavíkurborg,“ segir Oddrún í samtali. „Verktakar sem vinna lóðir fyrir Reykjavíkurborg fá plöntur hjá okkur líka, en við seljum ekki til almennings.“

Hagkvæmara en að kaupa blóm

„Að jafnaði erum við með 130 þúsund stök sumarblóm á ári. Bæði það sem við sáum fyrir og sumarblóm sem við tökum græðlinga fyrir og yfirvetrum í gróðurhúsum. Eins erum við með lauka.

Það er misjafnt hvað við sáum fyrir mörgum trjám, en við söfnum fræjum sjálf af trjám hérna á svæðinu og úti í bæ. Það fer allt eftir því hvernig vorið er hvort við fáum einhver fræ á haustin, en ef það kemur frost eftir blómgun á vorin er ekki von á mörgum fræjum. Yfirleitt söfnum við ekki fræjum utan borgarinnar. Við sáum fyrir trjánum á haustin og yfir vetrum úti.“

Aðspurð af hverju Reykjavíkurborg er með þessi umsvif bendir Oddrún á að hagkvæmni rekstursins hafi verið skoðuð ítarlega á sínum tíma. Sú úttekt hafi leitt í ljós að dýrara væri fyrir borgina að kaupa allar sínar plöntur annars staðar frá en að reka sína eigin garðyrkjustöð. „Þá er líka auðvelt að sækja plönturnar til okkar í staðinn fyrir að fara út fyrir borgarmörkin.“

Annatími nánast allt árið

Sáning á sumarblómum stendur yfir frá febrúar fram í apríl. Í lok febrúar, þegar fyrstu blómin hafa spírað og náð smá vexti eru þau sett í stærri potta. Um þessar mundir sinnir starfsfólkið jafnframt mikið klippingum og grisjun á trjám og runnum á svæðinu. „Í lok febrúar byrjar hasarinn á fullu, en þá höfum við varla tíma til að anda. Svo fyllast húsin smátt og smátt af plöntum sem þarf að vökva og gefa áburð. Við erum líka með runna inni í húsum sem þarf að sinna. Sumarblómum þurfum við svo að umpotta í stærri potta eftir því sem þær stækka.

Það fer allt eftir veðri hvenær við afhendum fyrstu blómin, en að jafnaði er þetta í kringum mánaðamótin maí-júní, jafnvel aðeins fyrr. Stefna bækistöðvanna er að vera búin að setja sem mest niður af blómum fyrir 17. júní. Þegar sumarblómin eru búin taka vorsáningarnar við. Þá sáum við fyrir birki, elri og ýmsum runnum. Eins setjum við niður plöntur á útisvæðin sem við höfum geymt í kæli yfir veturinn um leið og frost fer úr jörðu. Á sumrin þurfum við að binda trjáplöntur upp með bambus, gefa áburð, vökva og arfahreinsa.“

Þrif á húsum á veturna

Á haustin og vorin er mikið afgreitt af trjám og runnum, en þegar frystir snýr starfsfólkið sér að þrifum og sótthreinsun á húsum og búnaði. Í október eru sendir pöntunarlistar til bækistöðvanna og pantar ræktunarstöðin fræ samkvæmt áætlun fyrir næsta ár. Veturnir eru jafnframt notaðir til að setja trjáplöntur sem spíra í gróðurhúsum á vorin, eins og reyni, birki og elri, í kæligáma sem eru með þriggja gráðu frosti. „Þá hefst hringrásin á ný og þurfum við að gera allt tilbúið fyrir næsta febrúar þegar álagstíminn hefst aftur,“ segir Oddrún.