Fyrsta myglulausa sumarið frá 2018
Ekki hefur orðið vart við kartöflumyglu í sumar sem er þá fyrsta myglulausa sumarið frá 2018.
Kartöflumygla getur valdið miklu tjóni og eru nýleg dæmi um það frá síðustu árum. Helgi Jóhannesson, garðyrkjuráðunautur hjá Ráðgjafar- miðstöð landbúnaðarins, segir að hættan sé ekki liðin hjá, þó að hún fari minnkandi, því ef veður verður hlýtt og rakt fram eftir september og grös ekki fallin, geti hún náð sér á strik.
Í vor var hættan talin mikil á að öflug mygluafbrigði myndu berast til landsins með innfluttu útsæði. „Það var mikil útbreiðsla á kartöflumyglu í Evrópu síðastliðið sumar og hætta á myglusmiti í innfluttu útsæði. Þetta voru nýir og skaðlegir myglustofnar sem voru í umferð erlendis, með þol gegn varnarefnum,“ segir Helgi.
Strangar reglur um notkun varnarefna
Bændur á Suðurlandi settu niður talsvert af innfluttu útsæði í vor, en til mótvægis voru ráðlagðar fyrirbyggjandi varnaraðgerðir sem bændur nýttu sér allflestir sýnist mér. Helgi er kartöflubændunum til halds og trausts og ráðleggur þeim hvernig standa skuli að vörnunum.
„Varnarefnin sem bændur nota eru ýmist fyrirbyggjandi eða stöðva myglu sem komin er af stað. Um þessi efni gilda strangar reglur um notkun og uppskerufrest. Bændur þurfa sérstök notendaleyfi til að mega kaupa og nota efnin og efnin þurfa markaðsleyfi sem gefin eru út af Umhverfisstofnun,“ útskýrir hann.
Mygluspákort RML
Á vef RML hefur mygluspákorti verið haldið úti á undanförnum þremur sumrum sem byggir á veðurgögnum. „Bændur geta þar séð mygluhættu frá degi til dags og spá næstu daga. Með spánni geta bændur metið hættuna á myglu og hagað vörnum eftir því. Ef mikil hætta er á myglu, það er hlýtt veður og rakt, úða bændur með fyrirbyggjandi efnum samkvæmt ákveðinni forskrift. Ef lítil hætta er á myglu er hægt að sleppa úðun, seinka eða minnka skammtana. Ef myglan nær sér á strik og verður sýnileg eru notuð önnur efni sem stöðva útbreiðslu og hjálpa plöntunum að verða heilbrigðar. Til þess hefur þó ekki komið í sumar. Sennilega hefur veðurfarið í sumar hjálpað, það er fáir dagar með hlýju veðri, en örugglega líka öflugar varnir hjá bændum,“ segir Helgi.
Að mati Helga verður mygluhætta áfram fyrir hendi fram eftir hausti ef veðurskilyrði eru fyrir hendi. „Köld veðrátta í sumar verður til þess að bændur reyna að láta kartöflurnar stækka fram eftir hausti og seinka því uppskerustörfum. Þeir þurfa því að hafa varann á gagnvart myglu fram að uppskeru til geymslu, hvenær sem hún svo hefst fyrir alvöru.
