Frumleg og fjölbreytt verkefni
Viðskiptahraðallinn Til sjávar og sveita fer fram í annað sinn í haust og er samstarfsverkefni Íslenska sjávarklasans, Matarauði Íslands, Nettó og Landbúnaðarklasans. Nú hafa tíu fyrirtæki verið valin úr 70 umsóknum en Icelandic Startups hefur umsjón með hraðlinum. Fyrirtækin sem valin hafa verið hafa mörg hver skírskotun til landbúnaðar eins og framleiðsla á rjómalíkjör, sauðamjólk og svepparækt.
Viðskiptahraðallinn Til sjávar og sveita – frá hugmynd til hillu, leggur áherslu á sjálfbærar lausnir í landbúnaði og sjávarútvegi með það að markmiði að hvetja til aukinnar nýsköpunar í þessum greinum. Fyrirtækin 10 fá leiðsögn sérfræðinga í tíu vikur og aðgang að breiðu tengslaneti leiðbeinenda.
Eftirfarandi fyrirtæki voru valin:
Vegangerðin – Framleiðir matvöru sem inniheldur engar dýraafurðir.
Ovis Cosmetics – Framleiðir keratín úr hornum og klaufum sauðfjár sem nýtt er við framleiðslu snyrtivara.
Broddur – Heilsuskot úr broddmjólk mjólkurkúa.
Nielsen Restaurant – Framleiðir salatolíur úr vannýttum íslenskum villtum jurtum.
HorseDay – Stafræn þjálfunardagbók fyrir hesta sem styðst við æfingasafn viðurkenndra þjálfunaraðferða frá Háskólanum á Hólum.
Eylíf – Heilsuvörulína sem samanstendur af hreinum íslenskum hráefnum og framleidd hérlendis með sjálfbærum hætti.
Jöklavín – Fyrsti íslenski rjómalíkjörinn sem er framleiddur af megninu til úr innlendum hráefnum.
Sauðagull – Vinnur matarafurðir úr íslenskri sauðamjólk.
Sælkerar ehf. – Rækta mismunandi tegundir sveppa og míkrógrænmeti ásamt því að fara í þróunarvinnu á byggðarræktun.
Marea Íslenskt lífplast – Notar sjávarþang sem fæst hérlendis sem grunnefni í framleiðslu á niðurbrjótanlegum vörum sem koma í stað einnota plasts.
