Freyvangsleikhúsið setur upp frumsamið verk - Smán!
Freyvangur á sér langa sögu bæði samkomuhúss og leikhúss en það hefur iðað af lífi um árabil. Samkvæmt dagblaðinu Degi árið 1957 er „Sjónleikurinn Ráðskona Bakkabræðra sýndur að Freyvangi, Öngulsstaðahreppi“ auk þess sem ónefnd hljómsveit lék þar að loknum sjónleik.
Nú í ár er verkið Smán 59. stóra sýningin sem fer þar á fjalirnar, fyrir utan alla kabaretta og stuttverk sem hafa ratað þar á svið og má því segja að Freyvangsleikhúsið sé afar stór partur af sögu Eyjafjarðarsveitar og verður vonandi starfrækt þar áfram sem lengst.
Leikverkið Smán á sér þá forsögu að vorið 2019 var haldin handritasamkeppni á vegum Freyvangsleikhússins þar sem höfundar fóru undir dulnefnum. Höfundurinn Sigríður Lára Sigurjónsdóttir bar sigur úr býtum og Sindri Swan leikstjóri fenginn til að leikstýra. Fyrirhugaðri uppsetningu þurfti að fresta vegna ástandsins í samfélaginu en nú hafa þau Sigríður og Sindri unnið ötullega að útfærslu verksins og útkoman glæsileg. Leikverkið Smán gerist á kaffihúsi og bar á Norðurlandi um aldamótin 2000 þar sem halda til nokkrar ólíkar manneskjur. Verkið gerist á einni helgi og þarna á mörkum einkarýmis og almannafæris fáum við að fylgjast með hvernig líf þessa fólks fléttast saman á mismunandi vegu. Einnig rekast inn á barinn ýmsar persónur sem gæða staðinn lífi.
Samhliða því fylgjumst við með persónunni Marbellu þar sem hún gerir upp fortíðina í sínum eigin hugarheimi.
Allar eru persónurnar á einhvers konar flótta undan lífinu eða bara sjálfum sér og sumum verður tíðrætt um að fara eitthvað annað … eða vita jafnvel ekki hvort þau eru að koma eða fara, hvað þá hvert.
Alls eru á sviðinu 10 leikarar og að lágmarki 30 manns sem koma að uppsetningunni enda stór hópur hönnuða, smiða, tæknifólks og annarra sem til viðbótar við leikendur gera frábæra sýningu. Alheimsfrumsýning á Smán var 22. október síðastliðinn en nánari upplýsingar varðandi sýningartíma má finna á freyvangur.is sem og á FB síðu Freyvangsleikhússins. Miðapantanir eru á tix.is og í síma 857-5598.
