Framtíð Garðyrkjuskólans og nemendur í sviðsljósinu

Opið málþing um stöðu garð­yrkjunáms á Íslandi verður haldið í Garðyrkjuskólanum á Reykjum 19. mars 2022 næstkomandi. Markmið þingsins er að þrýsta á stjórnvöld að taka ákvörðun um framtíð skólans og garðyrkjunáms í landinu. Framtíð sem er skólanum og nemendum í hag.

Aðstandendur þingsins eru Snjólaug M. Jónsdóttir, nemandi á skrúðgarðyrkjubraut, sem út­­skrifast í vor, og Þórður Ingimar Runólfsson, sem útskrifaðist af garð- og skógarplöntubraut vorið 1990.

Forsvarsmenn greinarinnar

Fjöldi forsvarsmanna atvinnulífsins hefur boðað komu sína á þingið. Má þar nefna Gunnar Þorgeirsson, formann bændasamtaka Íslands, Berglindi Ásgeirsdóttur hjá SAMGUS, Heiðar Smára Stefánsson, Félagi skrúðgarðyrkjumeistara, Heimi Janusarson, FIT, Björn Bjarndal fyrir hönd skógarbænda, og Tinnu Bjarnadóttur blómaskreyti.

Einnig hefur fulltrúum Félags garðplöntuframleiðenda og Félags garðyrkjubænda verið boðið á þingið. Guðrún Hafsteinsdóttir þingkona hefur staðfest komu sína á þingið. Óskað var eftir að Svandís Svavarsdóttir matvælaráðherra og Ásmundur Einar Daðason mennta- og barnamálaráðherra ávörpuðu þingið. Svandís sá sér ekki fært að mæta og Ásmundur var ekki búinn að svara þegar blaðið fór í prentun.

Þingið hefst klukkan 13.00 með því að Guðríður Helgadóttir, starfsmenntanámsstjóri og garð­yrkju­­fræðingur, býður þinggesti velkomna að Reykjum. Því næst mun Aldís Hafsteindóttir, bæjarstjóri Hvergerðis, setja þingið en hún er jafnframt fundarstjóri. Gert er ráð fyrir að þinglok verði um 16.30.

Dagskrá þingsins

Nemandi í Garðyrkjuskólanum, Jóhanna Íris Hjaltadóttir, segir frá upplifun sinni af náminu og Reykjum, einnig mun fulltrúi starfsfólks segja frá upplifun sinni af vinnu við skólann.

Brautarstjórar kynna brautir sínar, markmið náms og framtíðarsýn hverrar brautar fyrir sig sem í dag eru blómaskreytingar, garðyrkjuframleiðsla, skógur og náttúra og skrúðgarðyrkja.

Því næst verður farið í skoðunar­ferð um skólann og boðið upp á kaffi.

Að loknu kaffihléi verðu fjallað um stöðu og framtíð garðyrkjunáms á Íslandi. Fulltrúar nemenda og starfsfólks munu segja frá hvernig sín upplifun er á þeirri óvissu sem er um stöðu námsins, hvaða áhrif það hefur haft á þau og hvernig þau sjá framhaldið og hvaða áhrif þetta hefur haft á þau.

Auk þess sem eftirfarandi fulltrúar starfgreina garðyrkjunnar munu taka til máls: Axel Sæland, formaður Félags garðyrkjubænda, Vernharður Gunnarsson, formaður Félags garðplöntuframleiðenda og Tinna Bjarnadóttir blómaskreytir, Heiðar Smári Harðarson, formaður Félags skrúðgarðyrkjumeistara, Björn Bjarndal, verkefnastjóri hjá Skógræktinni, Heimir Janusarson frá Félagi iðn- og tæknigreina, Berglind Ásgeirsdóttir, formaður Samtaka garðyrkju- og umhverfisstjóra og Gunnar Þorgeirsson, formaður Bændasamtaka Íslands

Að lokum verða bornar fram samþykktir þingsins og áskoranir á að þingmenn taki á málum garðyrkjunáms á Íslandi.