Framleiðsluvirði landbúnaðarins fyrir síðasta ár tæpir 63 milljarðar

Höfundur: smh

Hagstofa Íslands hefur birt yfirlit um heildarframleiðsluvirði landbúnaðarins fyrir síðasta ár og gerir samanburð á framleiðsluvirðinu þrjú ár aftur í tímann. Þar kemur fram að framleiðsluvirðið var 62,8 milljarðar á grunnverði á síðasta ári og lækkar um 0,5 prósent frá fyrra ári.

Framleiðsluvirði afurða búfjárræktar var 42,0 milljarðar króna og þar af vörutengdir styrkir og skattar um 11,6 milljarðar króna. Vörutengdir styrkir eru til dæmis beingreiðslur en vörutengdir skattar eru til dæmis búnaðargjald og verðmiðlunargjöld.

Virði afurða nytjaplönturæktar eru tæpir 16,7 milljarðar og þar af vörutengdir styrkir og skattar 604 milljónir króna, en var rúmir 16,1 milljarður árið á undan. Aðfanganotkun landbúnaðarins í heild er 40,3 milljarðar árið 2017 og lækkaði um 0,8% frá fyrra ári.

Í yfirliti Hagstofu Íslands segir að lækkun á framleiðsluvirði árið 2017 megi rekja til 5,1 prósenta lækkunar á verði, en á móti kemur 4,9 prósenta magnaukning. Notkun aðfanga eykst um 1,9 prósent að magni, en verð aðfanga lækkaði um 2,7 prósent.

Yfirlit Hagstofu Íslands um framleiðsluvirði greina landbúnaðarins árin 2015-2017:

Afkoma landbúnaðarins 2015-2017
Á verðlagi hvers árs, millj.kr.	2015	2016	2017	Breyting milli 2016/2017, %
Virði afurða nytjaplönturæktar	17.023	16.121	16.691	3,5
Þ.a. vörutengdir styrkir og skattar af nytjaplönturækt	295	118	604	411,9
Virði afurða búfjárræktar	43.807	42.538	42.039	-1,2
Þ.a. vörutengdir styrkir og skattar af búfjárrækt	10.336	10.574	11.598	9,7
Tekjur af landbúnaðarþjónustu	316	334	293	-12,3
Tekjur af óaðskiljanlegri aukastarfsemi	3.425	4.084	3.749	-8,2
Heildarframleiðsluvirði	64.571	63.077	62.772	-0,5
Kostnaður við aðfanganotkun	41.425	40.674	40.342	-0,8
Vergt vinnsluvirði	23.146	22.403	22.430	0,1
Afskriftir fastafjármuna	5.468	5.554	6.275	13,0
Hreint vinnsluvirði	17.678	16.849	16.154	-4,1
Aðrir framleiðslustyrkir	195	186	205	10,2
Aðrir framleiðsluskattar	0	0	0	..
Þáttatekjur	17.873	17.035	16.359	-4,0
Launakostnaður	4.855	6.186	6.511	5,3
Rekstrarhagnaður/einyrkjatekjur	13.018	10.849	9.848	-9,2
Leiga og önnur leigugjöld af fasteignum sem ber að greiða (jarðaleiga)	154	235	169	-28,1
Fjármagnsgjöld	3.652	4.469	4.303	-3,7
Fjáreignatekjur	76	184	198	7,6
Tekjur af atvinnurekstri	9.287	6.329	5.574	-11,9

Í skýringum Hagstofu Íslands við töfluna kemur fram að hækkunin í vörutengdum styrkjum og sköttum af nytjaplönturækt og afurðum búfjárræktar skýrist vegna þess að búnaðargjald er ekki lagt á frá og með tekjuári 2017.

Ýtarlegra talnaefni má finna á vef Hagstofu Íslands:

Talnaefni

Skylt efni: framleiðsluvirði landbúnaðarins