Forsætisráðherra stýrir í fjarveru Svandísar
Svandís Svavarsdóttir matvælaráðherra er farin í tímabundið veikindaleyfi. Katrín Jakobsdóttir forsætisráðherra mun stýra ráðuneytinu á meðan veikindaleyfi Svandísar stendur.
Svandís Svavarsdóttir matvælaráðherra birti tilkynningu um að hún væri komin í veikindaleyfi á Facebooksíðu sinni 22. janúar og kom tilkynningin flestum mjög á óvart. Hún hafði upplýst fjölskyldu sína og Katrínu Jakobsdóttur forsætisráðherra um veikindin áður en færslan var birt.
Hinn sama dag mælti Inga Sæland, formaður Flokks fólksins, fyrir tillögu til þingsályktunar um vantraust á Svandísi. Byggði vantrauststillagan á þeirri niðurstöðu umboðsmanns Alþingis að ákvörðun Svandísar um að stöðva hvalveiðar tímabundið sl. sumar hefði ekki átt sér nægjanlega stoð í lögum.
Inga dró vantrauststillöguna samdægurs til baka eftir að ljóst var að matvælaráðherra væri komin í veikindaleyfi. Flutningsmenn tillögunnar, auk Ingu, voru allir úr Flokki fólksins, þau Ásthildur Lóa Þórsdóttir, Eyjólfur Ármannsson, Guðmundur Ingi Kristinsson, Jakob Frímann Magnússon og Tómas A. Tómasson.
Forsætisráðherra hleypur í skarðið
Katrín Jakobsdóttir forsætisráðherra mun gegna störfum matvælaráðherra á meðan veikindaleyfinu stendur, að því er fram kemur hjá Stjórnarráðinu. Hún lét hafa eftir sér að verkefnum ráðuneytisins yrði forgangsraðað og að hún myndi sinna því sem nauðsyn bæri til meðan línur skýrist.
Á annan tug þingmála, frumvörp og tillögur til þingsályktana eru á borði matvælaráðherra fyrir vorþingið, sbr. útgefna þingmálaskrá. Þar á meðal varðandi breytingu á opinberu eftirliti með matvælum og breytingu á lögum um velferð dýra hvað eftirlit varðar. Flest beinast þingmálin þó að sjávarútvegi.
Ekki tilefni til aðgerða
Að morgni 22. janúar birti Svandís einnig færslu á Facebook þar sem hún ræðir álit umboðsmanns Alþingis vegna stöðvunar hennar á hvalveiðum sl. sumar. Þar kemur m.a. fram að ekki sé tilefni til sérstakra aðgerða vegna álitsins samkvæmt lögfræðiáliti úr matvælaráðuneytinu. Hún hyggist engu að síður gera tvennt:
Annars vegar að „fela óháðum aðila að fara yfir stjórnsýslu og lagaumgjörð hvalveiða, þ.m.t. alþjóðlegar skuldbindingar ríkisins, og valdheimildir stjórnvalda á þeim grundvelli. Álitsgjafi verði jafnframt beðinn um að gera tillögur að úrbótum eftir því sem við á, og eftir atvikum tillögur að breytingum á lögum.“
Hins vegar að „fela ríkislögmanni að leggja mat á framkomið erindi Hvals hf. þar sem félagið óskar eftir viðræðum við ríkið um mögulegt uppgjör vegna álitsins.“ Þetta geri hún til að undirstrika mikilvægt eftirlitshlutverk umboðsmanns Alþingis.
