Fögnum fjölbreytileikanum
Það er virkilega upplífgandi og hvetjandi að verða vitni að þeim fjölbreytileika sem einkennir sveitir landsins. Óhætt er að segja að sveitin blómstri, í orðsins fyllstu merkingu, sé litið til kúabænda og blómafjóssins að Flugumýrarhvammi í Skagafirði. Á hverjum bæ eru athafnamiklir bændur sem margir hverjir láta sér ekki nægja að sinna bústörfunum einum saman heldur dunda sér við ýmislegt annað þegar næði gefst til. Sköpunarkrafturinn dafnar í sveitinni og á sér engin takmörk, hvort sem bændur eru að skapa og framleiða fyrir heimilisfólkið eða til að fara út og sigra hinn stóra heim með hugvit sitt og framleiðslu.
Einnig er áhugavert að sjá alla þá hliðarorku sem sprettur út frá hefðbundnum búskap, þegar bændur fara nýjar leiðir og skapa aukið virði fyrir bú sín, hvort sem er við framleiðslu á nýjum vörum, í ferðaþjónustu eða með uppákomum og ferðum sem boðið er upp á. Þá er mikilvægt að almenningur og ferðamenn gefi sér tíma til að staldra við og njóta þess fjölbreytileika sem er á boðstólum. Það eru þó ekki eingöngu bændur á landsbyggðinni sem leggja sig alla fram við að virkja kraftinn sem svo víða er að finna, heldur einnig íbúar sem taka sér margt misjafnt fyrir hendur. Jafnvel flytjast borgarbörnin út á land og byrja með nýja og áhugaverða hluti sem allir sveitungar og ferðalangar njóta góðs af. Það er gott að finna afdrep, geta tyllt sér niður, staldrað við og spjallað við heimamenn. Unna sér í núinu.
Síðan fögnum við allri nýliðun í landbúnaði og þeim fjölbreytileika sem yngri kynslóðir koma inn með. Við sjáum einmitt dæmi þess hér í blaðinu. Ungt fólk úr höfuðborginni sem hefur hafið útiræktun í Hrunamannahreppi og sett nýja vöru á markað í sérhönnuðum umbúðum, íslenskar og eldrauðar nýuppteknar radísur. Því er jafnframt ánægjulegt að sjá að opnað hefur verið fyrir umsóknir um nýliðunarstuðning í greininni en markmið þess er að aðstoða nýliða við að hefja búskap og auðvelda ættliðaskipti. Það er von mín að sem flestir áhugasamir sæki um og að með nýju fólki komi jafnvel nýjar áherslur á bújörðum landsins. Fleiri styrkir og stuðningur sem komið hefur verið á undanfarin ár ættu jafnframt að geta orðið fleirum hvatning til að hugsa út fyrir rammann og prófa nýjungar. Alltaf er þörf fyrir gott fólk í hverja stétt.
Margbreytileikinn er nefnilega nauðsynlegur til að halda við lífi og störfum í byggðum landsins. Það auðgar hverja sveit að geta boðið upp á úrval af svæðisbundnu íslensku hráefni og menningu á hverjum stað. Þá er mikilvægt að öll tannhjólin í ferlinu virki saman og að nægileg hvatning og stuðningur sé fyrir hendi til að ýta undir frumleikann og framkvæmdagleði þess sem í hlut á. Það er ávinningur fyrir allt samfélagið að hafa lifandi byggðir þar sem hver og einn fær notið sín og að við hin fáum að hafa not af þeirri marghæfni sem fulltrúar landsbyggðarinnar hafa yfir að bjóða.
