Feykir 24+ er einn af 10 bestu ostum í heimi

Heimsmeistarakeppni osta fór nýlega fram í Wisconsin í Bandaríkjunum en íslenskur ostur var í fyrsta sinn á meðal keppenda um heimsmeistaratitilinn. Það var osturinn Feykir 24+ frá Kaup­félagi Skagfirðinga.

Mikil natni er lögð í framleiðslu á Feyki 24+ og tekur allt ferlið meira en 24 mánuði en það er tíminn sem hann þarf til að ná sínum einstöku eiginleikum í áferð og bragði. „Það telst stórsigur í þessari keppni að lenda í 8. sæti á fyrsta þátttökuári og er því um að ræða stórkostlegan árangur fyrir íslenska ostagerð, en allir ostarnir eru verðugir fulltrúar heimsmeistaratitilsins. Þarna eru mjólkurfræðingar og ostameistarar sem hafa stúderað þessa keppni og eru með mikinn fjölda osta og mjólkurvara ár hvert,“ segir Jón Þór Jósepsson, framleiðslustjóri hjá Kaupfélagi Skagfirðinga á Sauðárkróki. Heimsmeistarakeppnin er stærsta keppni sinnar tegundar í heiminum og er hún haldin ár hvert. Að þessu sinni voru sendir inn 2.978 ostar frá 29 löndum og 33 ríkjum innan Bandaríkjanna svo árangur Feykis 24+ er stórmerkilegur. Í dómnefnd sitja ostameistarar, mjólkurfræðingar, fulltrúar stærstu verslanakeðjanna, fulltrúar neytenda og aðrir fagaðilar og telur hún um 60 manns.

Mynd frá heimsmeistarakeppni osta en hér eru dómarar að fara yfir ostana. Feykir 24+ varð í 8. sæti, sem er glæsilegur árangur enda Skagfirðingar að rifna úr monti með ostinn sinn. Það vakti mikla athygli að fá íslenskan ost í keppnina. Myndir / Facebook-síða keppninnar