Ferðin á Heimsenda
Leikfélag Blönduóss, sem var endurvakið eftir níu ára dvala fyrir tveimur árum, setur nú á svið leikritið Ferðina á Heimsenda eftir Olgu Guðrúnu Árnadóttur.
Þetta er ævintýraleg saga þriggja vina sem þurfa að koma verndargripnum Geislaglóð til álfaprinsessunnar svo álfarnir leggist ekki í hundrað ára dvala. Þremenningarnir ganga á fjallið Heimsenda til að finna prinsessuna en verkefnið er eingöngu hægt að framkvæma á ákveðnum tíma við sérstakt sólarlag.
Unga fólkið afar virkt
Sigurður Líndal sér um leikstjórn eins og áður og segir Eva að skemmtilegt sé að fylgjast með krökkunum sem léku hjá þeim fyrir tveimur árum í verkinu Dýrið og Blíða. Nú séu þau mörg hver komin í aðalhlutverk, en alls standa 14 leikarar á sviðinu frá tíu ára til fimmtugs sem skipta með sér hlutverkum. „Unga fólkið hjá okkur er mjög virkt, hluti þeirra er m.a. að læra dans á Hvammstanga og á leið til Spánar í keppnisferð. Bara það að hafa þetta í boði, leiklist og dans, það breytir svo miklu fyrir samfélagið í heild. Svo gefur þetta unga fólkinu byr undir báða vængi til að halda áfram á þessari braut,“ segir Eva. Hún segir frá ungum manni sem var í einu aðalhlutverkanna fyrir tveimur árum, fór í leiklistarskóla hjá Bandalagi íslenskra leikara sl. sumar þar sem hann stóð sig gífurlega vel og stefnir nú á nám í Kvikmyndaskólanum í haust. „Þetta er strákur sem á pottþétt eftir að fara mjög langt á sviði. Áhugaleikhúsin eru svo stór þáttur, sérstaklega í minni samfélögum og svo gaman að sjá hvernig fólk oft virkjar hjá sér leynda hæfileika, hvort sem er á sviðinu eða í undirbúningi.
Viljum halda starfseminni lifandi
Eva segir að á meðan leikrit séu sýnd á tveggja ára fresti séu þau í leikfélaginu iðin við að halda námskeið, „open mic“ og annað. „Við vinnum að þessu markvisst því við viljum halda starfseminni lifandi eftir fremsta megni. Þetta hefur svo góð áhrif á alla sem taka þátt og ekki allir sem eru að æfa fótbolta eða aðrar íþróttir. Áhugaleikhúsin eru þroskandi á svo margan hátt, t.a.m. að þurfa að umgangast eldra fólk, standa og tala hátt og skýrt á sviðinu, það er agi að vera í leiklistinni, enda þýðir lítið að skrópa í stórum hóp þar sem allir þurfa að vera samstilltir,“ segir Eva að lokum og vill hvetja sem flesta til að reyna fyrir sér á sviði – eða á bak við það þar sem ærinn starfi er í gangi.
Frumsýnt verður í félagsheimilinu á Blönduósi fimmtudaginn 3. apríl klukkan 19 og þrjár sýningar í framhaldi af því, föstudag kl. 20, sunnudag kl. 14 og þriðjudaginn 8. er svo lokasýning klukkan 17. Miðaverð er kr. 4.000 og má panta miða í síma milli klukkan 16–20 hjá Erlu 825 1133 eða Evu 695 9168, í gegnum Facebooksíðu leikhússins eða á netfanginu leikfelagblonduoss@gmail.com.
