Eyrnamerki greinir atferli kúa
Sölumaðurinn Søren Møller Nørregaard hefur á undanförnum misserum gert sér upp undir tólf ferðir til Íslands til þess að kynna búnað sem greinir hreyfingar og hitastig kúa.
Búnaður þessi heitir Cow Manager og er festur í eyru kúa. Með því að nema hitastig og hreyfingar gripanna getur skynjarinn gefið upplýsingar um beiðsli og frávik tengd heilsufari. Skynjarinn er upprunninn frá Hollandi en seldur á Íslandi í gegnum Danmörku.
Cow Manager búnaðurinn er ólíkur flestum beiðslisgreinum sem er hægt að festa við hálsband kúa að því leyti að þessi fylgist stöðugt með hitastigi kúnna. Þar með getur skynjarinn gert viðvart með einhverjum fyrirvara ef kýr er líkleg til að verða veik. Jafnframt fylgist neminn með því hversu langur tími dags fer í að jórtra.
Søren bendir á að skynjararnir séu fjölnota og er ætlast til þess að bændur fjarlægi hann sjálfir áður en kýrnar eru sendar í sláturhús, en til þess þarf engin verkfæri. Búnaðurinn er í litlu gúmmíhúsi og hangir á festingu sem er eins og lítið eyrnamerki. Bændurnir eiga nemana sjálfir, en greiði fyrir þjónustuna og aðgang að tölvuforriti í gegnum áskrift. Enn fremur er hægt að sjá upplýsingar um hverja og eina kú myndrænt í gegnum app.
Núna er unnið að því að þýða hugbúnaðinn yfir á íslensku og vonast Søren jafnframt til þess að hægt verði að semja innan tíðar við Ráðgjafarmiðstöð landbúnaðarins um að upplýsingarnar verði tengdar við gagnagrunn hjá þeim. Sem stendur hafa fimm kúabú á Íslandi tekið þennan búnað í notkun og 37 í Danmörku.
Samhliða sölu á Cow Manager heldur Søren utan um sölu á Agro Tag eyrnamerkjum með örflögu sem notuð eru fyrir sauðfé. Á einni útgáfu þeirra er áfast sýnaglas sem gerir bændum kleift að taka DNA sýni um leið og gripurinn er merktur. Sýnaglasið losnar af og er sent á rannsóknarstofu þar sem meðal annars er hægt að greina hvort sauðkindin beri verndandi arfgerðir gegn riðu.
