Endurskinshúfa

Nú þegar sumri fer að halla erum við mæðgur byrjaðar að hugsa til haustsins. Eitt af því sem er frábært fyrir alla er húfa, vettlingar, legghlífar og fleira prjónað úr hinu frábæra endurskinsgarni okkar.  

 

Garnið er mikið öryggisatriði þegar dimma fer og ættu öll börn að hafa húfu á höfði með innbyggðu endurskini. Við gefum ykkur hér uppskrift að húfu sem hentar bæði strákum og stelpum en fleiri stærðir fylgja með kaupum á garni hjá okkur og endursöluaðilum garnsins. 

 

Stærð: 

10-12 ára (bláa húfan á myndinni).

 

Garn: 

Glühwürmchen endurskinsgarn fæst hjá Handverkskúnst - 1 dokka – skoðaðu litaúrvalið á www.garn.is.

 

Prjónar: 

Hringprjónn 40 sm, nr 5,5 og 6. Sokkaprjónar nr 6.

 

Prjónafesta:

15 lykkjur = 10 sm á prjóna nr 6.

 

Skammstafanir:

PM: prjónamerki

Aðferð: Húfan er prjónuð í hring og skipt yfir á sokkaprjóna þegar lykkjum fækkar í úrtöku. 

Húfan: Fitjið upp á hringprjón nr 5,5; 70 lykkjur, setjið PM og tengið í hring og prjónið:

Umferð 1: prjónið slétt

Umferð 2: prjónið *1 lykkju slétt, 1 lykkja brugðið* Endurtakið frá *-* út umferðina. 

Endurtakið umferðir 1 og 2, einu sinni enn. Skiptið yfir á hringprjón nr 6 og prjónið áfram umferðir 1 og 2 þar til húfan mælist 13 sm eða sú hæð sem þið viljið hafa á húfunni. 

 

Úrtaka: 

Umferð 1: Prjónið *2 lykkjur slétt saman, prjónið12 lykkjur slétt* endurtakið frá *-* út umferðina . Prjónið eina umferð; 1 slétt, 1 brugðin og passið að munstrið haldi áfram eins og áður.  ATH: úrtökulykkjan er alltaf prjónuð slétt.

Umferð 2: Prjónið *2 lykkjur slétt saman, prjónið 11 lykkjur slétt* endurtakið frá *-* út umferðina . Prjónið eina umferð; 1 slétt, 1 brugðin.

Umferð 3: Prjónið *2 lykkjur slétt saman, prjónið 10 lykkjur slétt* endurtakið frá *-* út umferðina . Prjónið eina umferð; 1 slétt, 1 brugðin.

 

Haldið áfram að taka úr á þennan hátt en fækkið um 1 lykkju á milli úrtaka, þar til 5 lykkjur eru eftir á prjónunum. Slítið bandið frá og dragið bandið í gegnum lykkjurnar sem eftir eru. Gangið frá endum og þvoið húfuna í höndunum eða á ullarprógrammi í þvottavél. Leggið til þerris.

 

Prjónakveðja,

mæðgurnar í Handverkskúnst

www..garn.is