Ekki unnið að því að fylgja markmiðum ESB

Atvinnuvegaráðuneytið vinnur ekki að áætlun um að Ísland fylgi markmiðum Evrópusambandsins í landbúnaði.

Þetta kemur fram í svari Hönnu Katrínar Friðriksson atvinnu- vegaráðherra 4. september við fyrirspurn frá Heiðbrá Ólafsdóttur, varaþingmanni Miðflokksins, frá 22. maí síðastliðnum.

Fyrirspurnin var eftirfarandi: „Er unnið að áætlun í ráðuneytinu um að Ísland fylgi markmiðum ESB í landbúnaði? Ef svo er, með hvaða hætti? Ef svo er ekki, hvers vegna ekki?

Í svari atvinnuvegaráðherra segir að ástæða þess að ekki sé unnið að slíkri áætlun sé að landbúnaður falli almennt ekki undir gildissvið samnings um Evrópska efnahagssvæðið þar sem samningurinn nær fyrst og fremst til innri markaðarins og fjórfrelsisins.

„Sameiginleg landbúnaðarstefna Evrópusambandsins (CAP) fellur því utan við gildissvið EES-samningsins. Viðskipti með tilteknar landbúnaðarvörur eru þó hluti af EES-samningnum, þar sem m.a. er kveðið á um frjálst flæði tiltekinna landbúnaðarafurða og vara sem tilgreindar eru í samningnum og viðaukum við hann, sbr. 3. mgr. 8. gr. samningsins, 19. gr. samningsins og bókun 3 um unnar landbúnaðarafurðir,“ segir enn fremur í svarinu.