Ekkert sláturhús á ríflega helft landsins
Sláturfélag Vopnfirðinga hættir rekstri og þar með verður síðasta sláturhúsinu á Austurlandi lokað. Næsta starfandi sláturhús er nú á Húsavík.
„Rekstraraðstæður Sláturfélags Vopnfirðinga hf. gera það að verkum að félagið er ekki lengur samkeppnishæft um verð á við stóru húsin,“ segir Skúli Þórðarson, framkvæmdastjóri Sláturfélags Vopfirðinga. „Því óskaði stjórnin eftir heimild til að hætta slátrun og selja eignir félagsins, og í framhaldi af því, slíta félaginu þegar allt hefur verið gert upp. Það var svo samþykkt á hluthafafundi, mótatkvæðalaust, 22. febrúar sl. þar sem mætt voru 87% hluthafa Sláturfélags Vopnfirðinga hf.,“ segir hann.
Hluthafar voru um 64 talsins. Heimamenn, þ.e. Vopnafjarðarhreppur, Búnaðarfélag Vopnafjarðar og bændur, hafa átt meirihluta hlutabréfa en kaupandi afurða félagsins, Kjarnafæði Norðlenska, um 35% hlutafjár.
Veruleg áhrif
Aðspurður um áhrif lokunarinnar á samfélagið og bændur á austurhluta landsins segir Skúli að við hana muni fjögur heilsársstörf hverfa, og umreiknuð öll störf hjá Sláturfélagi Vopnfirðinga séu u.þ.b. 10 ársstörf.
„Þetta mun augljóslega hafa talsverð áhrif í litlu sveitarfélagi, með minnkandi útsvarstekjum sveitarfélagsins og minnkandi afleiddri veltu. Til viðbótar hefur innspýting af 30–40 manns í september og október, í sauðfjársláturtíð, haft jákvæð áhrif á samfélagið á Vopnafirði. Því verður ekki neitað að fyrir íbúa staðarins verður vissulega erfiðara að nálgast kjöt á hagstæðu verði, þar sem við höfum selt kjöt beint til neytenda á svæðinu, í Kauptún og jafnvel í togarana,“ segir hann.
Langt að fara með sláturfé
Skúli segir þjónustu við bændur nú verða lengra í burtu og flutningur á fé um 150–250 km lengri, eftir því hvaða sláturhús bændur velji að leggja inn hjá. Gert sé ráð fyrir að gera upp við alla innleggjendur fyrir septemberlok, í síðasta lagi, hjá Sláturfélagi Vopnfirðinga. Reiknað sé með að bændur komist þokkalega að hjá öðrum sláturhúsum.
Ekkert starfandi sláturhús er nú frá Selfossi í suðvestri norður á Húsavík og þurfa bændur því eftirleiðis að leita þangað eða lengra með slátrun.
