Einn úr bændastétt kjörinn til þingsetu

Einungis einn bóndi var kjörinn til setu á Alþingi Íslendinga í nýliðnum kosningum.

Þórarinn Ingi Pétursson Framsóknarmaður er 10. þingmaður Norðausturkjördæmis og bóndi á Grund í Grýtubakkahreppi.

Á síðasta þingi sátu fjórir þingmenn sem telja má til bændastéttar með góðum vilja, sem starfandi eða fyrrverandi bændur; Ásmundur Einar Daðason, Halla Signý Kristjánsdóttir, Haraldur Benediktsson og Þórarinn Ingi Pétursson.

Hefði viljað fleiri bændur á þing

Spurður um stöðu mála segir Þórarinn Ingi að hann hefði viljað hafa fleiri bændur á þingi og reyndar almennt fleira fólk beint úr atvinnulífinu. Þróunin hafi þó verið í þessa átt á undanförnum árum, að þeim fari fækkandi.

„Þingmennskan er gríðarlega krefjandi starf og hálfgert brjálæði vinnulega séð að standa í þessu saman, en konan mín, Hólmfríður Björnsdóttir, sér alveg um búskapinn á meðan ég er fjarverandi. Börnin okkar eru vaxin úr grasi en koma og hjálpa til á álagstímum, eins og reyndar núna,“ segir Þórarinn, en blaðamaður náði tali af honum á fengitíma sauðfjár seint í desember.

Þórarinn Ingi segist vera með um 500 vetrarfóðraðar kindur og fylgjast spenntur með þróuninni á ræktun á sauðfé með verndandi arfgerðir gegn riðu – og horfir til þess að kaupa hrúta á árinu með þessa erfðabreytileika.

„Það er mjög gleðilegt að fylgjast með hversu hröð þróunin hefur orðið í þessari ræktun og þessum mikla áhuga sem er hjá ungum bændum í dag. Afkoman hefur aðeins skánað hjá sauðfjárbændum en það þarf enn að laga til í þessum málum og það er krafa um að sköpuð séu skilyrði hjá löggjafanum um enn betri kjör, því við eigum að framleiða miklu meira af mat hér á landi,“ segir Þórarinn, sem var formaður Landssamtaka sauðfjárbænda á árunum 2012 til 2016.

Bændur áður fyrr atkvæðameiri á Alþingi

Áður fyrr voru bændur atkvæðameiri á Alþingi. Tveir sannkallaðir Bændaflokkar hafa verið starfandi á Íslandi. Sá fyrri var stofnaður árið 1912 af nokkrum bændum sem áttu sæti á Alþingi og þegar þing kom saman 1913 var þingflokkurinn formlega stofnsettur með aðkomu þriggja þingmanna úr Sambandsflokknum. Alls sátu 16 þingmenn á Alþingi fyrir eldri Bændaflokkinn.

Fyrir landskjörið 1916 klofnaði flokkurinn og klofningsframboðið Óháðir bændur varð til. Bændaflokkurinn fyrri rann svo inn í Framsóknarflokkinn við stofnun hans árið 1916. Seinni Bændaflokkurinn var stofnaður í desember 1933, eftir klofning úr Framsóknarflokknum. Hann var lagður niður á árinu 1942 eftir að hafa náð 6,5 prósenta fylgi í alþingiskosningunum 1934 og fengið þrjá þingmenn kjörna en sex prósenta fylgi árið 1937 og tvo menn kjörna.