Chevrolet Spark hefur lítið breyst en lækkar í verði

Í júní 2010 prófaði ég og skrifaði um  Chevrolet Spark LT og lét vel af honum. Nú sex árum seinna tók ég smáhring á eins bíl (Spark LT). 

 

Við fyrstu sýn virtist allt vera svipað nema eitt hestafl í viðbót og verð hefur lækkað um 500.000.

 

82 hestafla vélin skilar bílnum vel áfram

 

Fyrir sex árum var Spark í boði með tveim vélarstærðum (100cc og 1200cc), en nú er það bara stærri vélin sem er 1200 rúmsentímetra vél og á að skila 82 hestum (bæst við eitt hestafl á 6 árum). 

 

Svona stór vél í litlum, léttum bíl skilar honum vel áfram, jafnvel fullhlaðinn keyrandi brattar brekkur í íslensku roki bætir Spark sáralítilli bensíneyðslu við sig, en margir smábílar með minni vélar sem ég hef prófað eru jafnvel að bæta við eyðsluna allt að þrem lítrum á hundraðið í miklum mótvindi þar sem vélarnar eru einfaldlega ekki nógu kraftmiklar fyrir íslenska vegi og veðurfar.

 

Skráður 5 manna með 5 stjörnu öryggi

 

Spark er einn af fáum smábílum sem fær fimm stjörnur í árekstursprófunum enda er hönnunin á honum þannig að inni í öllum hurðum, þaki, hvalbak og undir bíl eru styrktarbitar sem eru hannaðir eins og veltibúr í kappakstursbílum (stundum kallaðir krossbitar). 

 

Chevrolet Spark er skráður fimm manna, en fyrir mér er Spark bara bíll fyrir fjóra og sem dæmi þá settust synir mínir báðir aftur í bílinn og þar sem þeir sátu sagði annar: „Myndi ekki einu sinni bjóða hundinum á milli okkar þótt mjór sé.“ Farangursrými er ekki nema 170 lítrar þegar sæti eru uppi.

 

Engin ástæða til að breyta því sem gott er

 

Útlitið á Spark hefur verið nánast það sama frá upphafi og það góða við bílinn er að hann bilar lítið í samanburði við jafninga sína. Svo sem engin ástæða að breyta því sem virkar vel. Í prufuakstrinum gafst mér tækifæri á að prófa bílinn í vel svellaðri brekkunni upp að skíðasvæðinu í Skálafelli. ABS bremsukerfið virkaði vel ásamt stöðugleikakerfinu, en þess ber að geta að bíllinn var á glænýjum Toyo vetrarhjólbörðum sem gáfu mjög gott grip.

 

Spurning hvað lengi verður hægt að fá Chevrolet Spark

 

Eins og margir vita þá er Chevrolet og Opel í raun sama fyrirtækið, Opel er ætlaður til sölu í Evrópu, en Chevrolet í Ameríku. Enn er hægt að fá Chevrolet Spark í Bílabúð Benna á mjög góðu verði (oft hefur Bílabúð Benna verið fyrst til að lækka verð á sínum bílum þegar innkaupsverð og gengi er hagstætt). Spark hefur verið mjög vinsæll smábíll sem margir munu sakna ef hann hverfur af markaði. Chevrolet Spark LT er á verði frá 1.990.000 (500.000 ódýrari en hann var fyrir 6 árum).

 

Helstu mál og upplýsingar: