Búvörusamningar og breytingar á félagskerfi
Höfundur: smh
Aðalfundur Sambands garðyrkjubænda (SG) var haldinn á Hótel Selfossi þann 14. apríl síðastliðinn.
Að sögn Katrínar Maríu Andrésdóttur, framkvæmdastjóra SG, var fundurinn prýðilega sóttur af félögum. Auk hefðbundinna aðalfundarstarfa fjölluðu félagsmenn og gestir um fjölmörg mál sem brenna á garðyrkjubændum um þessar mundir.
Búvörusamningar og breytingar á félagskerfi bænda
„Sigurður Ingi Jóhannsson landbúnaðar- og sjávarútvegsráðherra var meðal gesta fundarins og hann fjallaði um þá sýn sem hann hefur á endurnýjun búvörusamninga. Sigurður sagði að horft væri til þess að gera búvörusamning til 10–15 ára svo tryggja megi aukinn stöðugleika í rekstrarumhverfi landbúnaðarins,“ segir Katrín María.
„Sigurgeir Sindri Sigurgeirsson, formaður Bændasamtaka Íslands (BÍ), kynnti fundarmönnum þær breytingar sem eru í farvatninu varðandi félagskerfi bænda, meðal annars nýtt fyrirkomulag á félagsgjöldum til BÍ, sem staðfestar voru á síðasta Búnaðarþingi sem haldið var í mars síðastliðnum. Líflegar umræður sköpuðust um þessi mál sem hafa ríkuleg áhrif á starfsumhverfi garðyrkjubænda.“
Nýr garðyrkjuráðunautur
„Þá kynntu fulltrúar Ráðgjafarmiðstöðvar landbúnaðarins drög að þrepaskiptum þjónustusamningum sem garðyrkjubændum standa til boða, en síðustu misseri hefur verið unnið að þróun þeirra í samráði við bændur. Ætlunin er að þjónustan taki í auknum mæli mið af ólíkum þörfum í ræktun og framleiðslu og verði í raun sérsniðin eins og best hentar hverjum notanda. Fyrirhugað er að fram fari nánari kynning á þjónustunni. Helgi Jóhannesson kynnti sig fyrir fundarmönnum, en hann mun taka til starfa sem garðyrkjuráðunautur í byrjun maí.
Framleiðnisjóður landbúnaðarins tekur við umsjón þróunarstuðnings
Katrín María segir Þórhildi Þorsteinsdóttur, framkvæmdastjóra Framleiðnisjóðs landbúnaðarins, hafa á fundinum kynnt þær breytingar sem urðu um síðustu áramót þegar sjóðurinn tók við umsjón með ráðstöfun framlaga – af SG – til kynningarverkefna, rannsókna, tilrauna, vöruþróunarverkefna og endurmenntunar. „Framvegis skal umsóknum um framangreinda þætti skilað til Framleiðnisjóðs, sem afgreiðir þær að undangengnu mati fagráðs í garðyrkju. Í fagráðinu sitja fulltrúar SG og BÍ en nánari upplýsingar og verklagsreglur um ráðstöfun framlaga má nálgast á vefsíðu Framleiðnisjóðs www.fl.is.“
Gunnar Þorgeirsson tekur við formennsku af Sveini A. Sæland
Á fundinum var kjörin ný stjórn SG. Sveinn A. Sæland, sem verið hefur formaður SG síðustu ár, hvarf úr stjórn ásamt Vernharði Gunnarssyni. Nýr formaður var kjörinn Gunnar Þorgeirsson í Ártanga. Aðrir í stjórn eru Helga Ragna Pálsdóttir, Óskar Kristinsson, Sigrún Pálsdóttir og Þorleifur Jóhannesson.
