Brottflutningur innflytjenda skaðar bændasamfélag
Í október gerðu fulltrúar innflytjendaeftirlits Bandaríkjanna atlögu að Wilder í Idaho, sem er afskekkt landbúnaðarhérað sem reiðir sig á erlent vinnuafl.
Harðar aðgerðir stjórnvalda koma heimamönnum á óvart, enda kusu 91 prósent íbúa Wilder Donald Trump til forseta í kosningunum 2024. Undanfarið hefur forsetinn gripið til harðra aðgerða gegn innflytjendum í borgum eins og Minneapolis, Chicago og Los Angeles, þar sem stuðningsmenn Demókrata eru í meirihluta. Frá þessu er greint á vef New York Times.
Á samkomu í október á veðhlaupahring í Wilder, sem sótt var af fólki sem á uppruna sinn að rekja til Rómönsku Ameríku, var nokkur hundruð manns smalað saman. Aðeins fjórir hafa verið ákærðir vegna ólöglegrar veðmálastarfsemi, en 105 einstaklingar voru teknir í varðhald vegna gruns um að vera ólöglegir innflytjendur. 75 hafa verið sendir úr landi. Alríkisstjórnin hefur verið ásökuð um að nota baráttu gegn ólöglegum veðmálum sem yfirvarp til að beita hörðum aðgerðum gegn innflytjendum. Í aðgerðum stjórnvalda voru viðstaddir ekki spurðir út í hvort þeir hefðu verið vitni að veðmálastarfsemi, heldur hvar þeir væru fæddir.
Í Wilder búa 1.725 manns og segja íbúar aðgerðir stjórnvalda valda ótta og óöryggi. Varað er við neikvæðum áhrifum þegar kemur að vorverkum á bújörðum í vor. Byggðin var sett á fót af bændum snemma á tuttugustu öldinni. Til að byrja með var þar mikið af farandverkamönnum frá Mexíkó sem unnu árstíðarbundin störf, en með tíð og tíma hefur það þróast yfir í varanlega búsetu. Í bænum er stórt samfélag íbúa með uppruna frá Rómönsku Ameríku, ýmist með ríkisborgararétt, dvalarleyfi eða óskráðir og stór hluti starfar fyrir bændur á svæðinu í kring.
