Blómlegt skáklíf í Hafnarfirði

Undanfarna mánuði hefur skáklífið blómstrað í Hafnarfirði. Auk skákæfinga Skákdeildar Hauka fyrir börn og unglinga, hafa bæst við mánaðarleg skákmót sem hafa gengið framar vonum. Þau eru yfirleitt haldin um miðjan eða seinni hluta mánaðarins á fimmtudagskvöldi. Hægt er að finna mótin á mótaáætlun skák.is. Þegar nýjum mótum er komið á fót tekur oft langan tíma að byggja þau upp og fá almennilega mætingu. Þetta þekki ég sjálfur þegar ég kom að mótahaldi TR á þriðjudagskvöldum fyrir nokkrum árum, en nú er teflt þar tvisvar í viku eins og í gamla daga, á þriðjudögum og fimmtudögum, allt árið. Stundum var mætingin svekkjandi, og það tók tíma að komast upp í tveggja stafa tölu. Það er ekki staðan hjá Haukum en í kringum 40 hafa verið að sækja mótin. Kannski hjálpar til að mótin séu aðeins sjaldnar, einu sinni í mánuði, og hvert mót auglýst sem stakur viðburður. 

Einnig gengur skólaskákin vel í Hafnarfirði. Nú á vormánuðum voru haldnar grunnskólakeppnir í bæði eldri og yngri flokkum. Skólarnir sendu þar sveitir til leiks sem tefldu gegn öðrum skólum bæjarins. Hvaleyrarskóli vann bæði í miðstigi og elsta stigi. Á myndinni er sigurlið skólans í miðstigi. Kiwanisklúbburinn Hraunborg ásamt Helga Ólafssyni stórmeistara (og skákpistlahöfundi Morgunblaðsins) komu að mótshaldinu. Þetta helst allt í hendur, og af þessum mótum rata margir á æfingar og mót og leggja skákina fyrir sig. 

Reyndar er skólaskákin í góðum málum um land allt. Nú um helgina fer fram Landsmót í skólaskák í Ólafsvík. Gaman er að segja frá því, að öll svæðamótin, áður kjördæmamót, hafa verið endurvakin þannig að keppendur verða frá öllum landshlutum. Í fjölda ára var ekkert svæðamót á Austurlandi og það er einkar ánægjulegt að það hafi verið endurvakið. Keppendur munu koma frá Reykjavík, Kraganum ásamt Suðurnesjum, Vesturlandi, Vestfjörðum, Norðurlandi vestra og eystra, Austurlandi og Suðurlandi. Teflt verður í þremur aldursflokkum, tólf í hverjum flokki þar sem teflt er allir við alla með atskáktímamörkum. Teflt verður í Klifi Ólafsvík, glæsilegu félagsheimili. Þar verður nóg pláss! 

Umsjón: Gauti Páll Jónsson

Gauti.pj[hjá]hotmail.com