Blítt og létt í Ölfusrétt

Sólin skein á gangnamenn og gesti Ölfusréttar sunnudaginn 15. september síðastliðinn.

Ölfusrétt, sem staðsett er í mynni Reykjadals, var tekin í notkun árið 2016. Dr. Ólafur Dýrmundsson, fyrrverandi landsráðunautur hjá Bændasamtökum Íslands og fjárbóndi í Reykjavík, hannaði og teiknaði réttina. „Þetta er mjög þægileg rétt, bæði fyrir fjárbændur og réttargesti og hefur reynst vel. Ég hef hannað fleiri réttir hér á svæðinu, svo sem í Húsmúla og Krýsuvík.“

Hann lýsir því svæði sem smalað er til Ölfusréttar. „Það afmarkast að vestan af Skarðsmýrarfjalli, Hengli og Hengladölum, að norðan af sveitarfélagamörkum Ölfuss og Grafnings við Kýrgil og Ölkelduháls, að austan frá vörslugirðingu í Grafningsfjöllum, sem þar liggur frá Álúti, og þaðan austan Grændals, suður um Kamba, og þá tekur við vörslugirðingin í Orrustuhólahrauni á Hellisheiði sem myndar suðurmörkin,“ útskýrir Ólafur en daginn áður höfðu Ölfusingar smalað heiðalönd sín vestan Hengils til Húsmúlaréttar neðan Kolviðarhóls.

Eftir að hafa komið öllu fénu að réttinni hjálpuðust jafnt ungir sem aldnir við að draga féð í dilka.

Ólafur var þar staddur ásamt Sigurrós, dóttur sinni, í leit að fé úr Reykjavík og Kópavogi en hann heldur að jafnaði 10–12 vetrarfóðraðar í Breiðholtinu. „Lögrétt okkar er Fossvallarétt í Lækjarbotnalandi en við fáum líka fé í Húsmúlarétt, Hraðastaðarétt, Heiðarbæjarrétt, Ölfusrétt og Grafningsrétt þar sem ég var í gær,“ sagði Ólafur.

Hann hefur átt kindur í Reykjavík, og um skeið í Kópavogi, síðan 1957. Hann segist hafa fyrst komið í Ölfusrétt fyrir sextíu árum síðan. „Þá í gömlu Ölfusréttina í Hveragerði sem stóð nokkurn veginn þar sem Hótel Örk er. Hún var mjög stór, hlaðin úr hraungrýti, féð þá mjög margt.“