Bleikjuharðfiskur úr heimilisbakarofninum

Auðvelt er að gera sinn eigin „harðfisk“ heima í eldhúsi úr flökum smáfisks. Flökuð, smá bleikja er tilvalin til að prófa sig áfram.

Harðfiskur smakkast mörgum vel og á almannavitorði að fiskþurrkun er algeng meðal þjóða. Færri vita kannski að unnt er að gera eigin afbragðsgóða „harðfisk“ heima í eldhúsi. Þetta kom í ljós í samtali við ágætan mann á Austurlandi fyrir allnokkrum árum. Hann fór af og til og grisjaði fjallavatn nokkurt, grunnt bleikjuvatn, með félögum sínum svo það yrði ekki ofsetið og allur fiskur þar með smár. Smábleikjuna sem veiddist flakaði hann svo, lagði í pækil og þurrkaði heima hjá sér eftir kúnstarinnar reglum og varð úr bragðgóður harðfiskur sem hann bar jafnan á sér í poka og bauð þeim að smakka sem á vegi hans urðu, við góðar undirtektir.

Aðferð:

• Smá og þunn, snyrt fiskflök eru lögð í 6% saltpækil í tæpan hálftíma í ísskáp.
• Flökum raðað á ofngrindur í einföldu lagi, með bili á milli.
• Sett í heimilisofninn á 30 °C, blástur, í 24–48 klst. eða uns fiskurinn er orðinn gegnþurr. Gott er að hafa ofurlitla rifu á ofninum.

Saltpækill:

• Saltpækill fyrir þunn smáflök er búinn til með því að leysa salt upp í vatni (ca 70 g salt í 1 lítra af vatni). Gæta þarf að því að pækillinn umlyki flökin vel og a.m.k. sé rúmlega sama magn af pækli og fiski.
• Gera má ráð fyrir að eftir því sem flökin eru þykkri þurfi því sterkari saltpækil og sömuleiðis lengri söltunartíma. Saltpækilsupplýsingar finnast á veraldarvefnum.

Geymið heimaþurrkaðan fisk í lokuðum umbúðum í ísskáp uns hans er neytt og geymið ekki of lengi.

Austfirðingurinn sem áður var um getið sagðist líka hafa þurrkað pækilfisk á ofninum heima hjá sér, en heimilisbakarofninn er áreiðanlega hentugri, að ekki sé talað um sérstaka þurrkofna sem fást hérlendis.

Greinarhöfundur brá undir sig betri fætinum eitt árið og pæklaði og þurrkaði grisjunarbleikju úr austfirsku fjallavatni. Þetta var m.a. borið fyrir gesti í hádegisveislu á aðfangadag og vakti hrifningu, jafnt hjá ungum sem eldri matgæðingum. Rifið var úr roðinu uns allt var upp urið.