Besta sveitahótel í heiminum

Hótel Rangá hlaut nýlega viðurkenningu, sem besta sveitahótel í heiminum, sem veitt er af hótelkeðjunni Small Luxury Hotels of the World (SLH).

Sérstaða hennar er að leggja áherslu á lítil lúxushótel með frumlega hugsun, mikla áherslu á umhverfisvernd og persónulega þjónustu. „Ég átti ekki von á því að okkur hefði hlotnast sá heiður að verða valið og umsagnirnar voru þannig að þakklæti til starfsfólks hótelsins varð mér efst í huga þar sem frábærir starfsmenn eiga vitanlega stærstan þátt í velgengni okkar,“ segir Friðrik Pálsson, hótelstjóri og eigandi, aðspurður um sín fyrstu viðbrögð við viðurkenningunni.

Þúsund aðildarumsóknir á hverju ári

„Samtökin SLH samanstanda af yfir 500 lúxushótelum frá 90 löndum. Á hverju ári berast þeim yfir 1.000 aðildarumsóknir en þau samþykkja einungis fimm prósent af þeim. Að fá inngöngu í samtökin er því heiður út af fyrir sig. Viðmið þeirra eru ströng og er hver eign skoðuð rækilega til að tryggja gæðakröfur. Á hverju ári fáum við „hulduheimsókn“ þar sem farið er yfir 400 atriði á lista, ekkert er undanskilið og við þurfum að standast yfir 80% af viðmiðum. Við höfum verið vel yfir 90% síðustu ár.

Það að hafa verið valið besta sveitahótelið af þessum frábæru hótelum sem eru í keðjunni er alveg einstakt og mikill heiður,” segir Friðrik alsæll og stoltur.

Þakkir til bænda

Þegar Friðrik var spurður hvort eitthvað sérstakt lægi á honum þá var hann fljótur til svars.

„Ég vil þakka íslenskum bændum fyrir fórnfúst starf við erfiðar fjárhagslegar aðstæður og hæla þeim frábæru vörum sem þeir framleiða fyrir okkur og við höfum mikla ánægju af að kynna fyrir gestum okkar. Það er gríðarlega mikilvægt að landsmenn allir standi vörð um íslenskan landbúnað og skilji nauðsyn þess á viðsjárverðum tímum að fæðuöryggi þjóðarinnar verði tryggt. Þar treystum við á íslenskan sjávarútveg og landbúnað.“