Beðið útgáfu reglugerðar um eyrnamerki í sauðfé
– Samstarfi um endurskoðun lauk í árslok 2025
Á deildarfundi sauðfjárbænda hjá Bændasamtökum Íslands (BÍ) á Búnaðarþingi í mars, vakti Eyjólfur Ingvi Bjarnason, formaður deildarinnar, athygli á því að enn væri unnið að útgáfu nýrrar merkingarreglugerðar búfjár, þar sem skerpt er á skilgreiningu örmerkja fyrir sauðfé. Undanþága um endurnýtingu slíkra merkja rann út 1. nóvember síðastliðinn.
Sigurbjörg Ólöf Bergsdóttir, sérgreinadýralæknir hjá Matvæla- stofnun, segir að merkingamálin séu í hálfgerðri biðstöðu eins og er. „Verið er að vinna að útgáfu nýrrar merkingarreglugerðar, en þangað til að hún kemur út þá gildir sú gamla.“
Nota má venjuleg eyrnamerki og eyrnamerki með örmerkjum
„Endurnýting á eyrnamerkjum var bönnuð frá og með síðasta hausti og sú ákvörðun er búin að vera þekkt lengi. Það stendur ekki til að taka upp örmerki í staðinn, það er misskilningur. Eyrnamerki koma til með að vera áfram í gildi, bæði venjuleg eyrnamerki og eyrnamerki með örmerkjum.
Starfshópur um endurskoðun merkingarreglugerðar hefur að mestu lokið störfum og er nú verið að vinna verkið áfram í ráðuneytinu. Það að endurnýting á merkjum sé bönnuð er krafa frá Evrópusambandinu. Við fengum undanþágu til þess að leyfa endurnýtingu til hausts 2025,“ segir Sigurbjörg og bendir á að krafan um bann við endurnýtingunni hafi komið frá Eftirlitsstofnun EFTA.
Ekkert frést af útgáfunni
Eyjólfur segir að málið hafi verið lengi í gangi í stjórnsýslunni. „Síðastliðin tvö ár hefur verið unnin vinna þvert á búgreinar innan BÍ ásamt Matvælastofnun og ráðneytinu um endurskoðun á reglugerð um merkingar búfjár. Sú vinna var klár í lok árs 2025 en ekkert hefur enn heyrst af því hvenær eigi að ljúka vinnunni og auglýsa nýja reglugerð.
Þeir bændur sem hafa notað örmerki í sínum búskap hafa fengið flögurnar til baka gegnum árin og getað endurnýtt þær í ný merki árið eftir.
Í endurskoðaðri reglugerð er ekki gert ráð fyrir endurnotkun merkja, en ekki verið svarað hvort gefin sé aðlögun í tiltekin ár. Týpur örflagna eru mismunandi og þeir sem lengst hafa notað merkin eiga lager af merkjum sem hægt væri að nota í einhver ár. Langflestir sem kæmu nýir inn færu væntanlega í merki sem eru einnota,“ segir Eyjólfur.
Hann bætir við að vinnan hafi fyrst og fremst snúist um að skerpa á regluverki varðandi gerð talnakóða í örmerki.
„Um það gilda engar reglur í dag og í raun ekkert sem kemur í veg fyrir að sama 15 stafa talnaruna komi í fleiri en einum grip. Slíkt er ólíklegt en hefur gerst að ég best veit. En notkun þeirra verður valfrjáls.“
Samkvæmt upplýsingum sem fengust úr atvinnuvegaráðuneytinu er vinna enn í gangi vegna þessa máls og ekki liggur fyrir hvenær von sé á niðurstöðu.
