Bærinn okkar Miðhóp
Núverandi ábúendur og eigendur að Miðhópi eru Kristín Guðmundsdóttir og Ólafur Benediktsson sem tóku við búinu af foreldrum Ólafs þeim Elínborgu Ólafsdóttur og Benedikt Axelssyni sem hófu búskap á jörðinni 1963.
Býli: Miðhóp.
Staðsett í sveit: Nyrsti bær í Víðidal í Húnaþingi vestra.
Ábúendur: Kristín Guðmundsdóttir og Ólafur Benediktsson.
Fjölskyldustærð (og gæludýra):
Börnin eru þrjú, Guðmundur Bjarki 18 ára nemi í VMA og tvíburarnir Elín Marta og Ásgeir Ómar 12 ára. Hundarnir eru tveir (hreinræktaðir blendingar), Snúlla og Tína.
Stærð jarðar? Um 1.600 ha.
Gerð bús? Sauðfjárbú.
Fjöldi búfjár og tegundir? 500 kindur og 30 hross.
Hvernig gengur hefðbundinn vinnudagur fyrir sig á bænum? Fer eftir árstíma. Nú er heyskapur aðalmálið. Vorverkin að mestu búin. Óli sæðir kýr og Stína útdeilir plöntum til skógarbænda í Húnavatnssýslum.
Skemmtilegustu/leiðinlegustu bústörfin? Engin verk eru svo sem leiðinleg en einhver sem eru ágæt þegar þau eru búin.
Hvernig sjáið þið búskapinn fyrir ykkur á jörðinni eftir fimm ár? Fjölga fénu og hugsanlega kaupa eitthvað af nágrannakotunum.
Hvaða skoðun hafið þið á félagsmálum bænda? Þau eru vonandi í réttum farvegi en stofnun RML veikti félagskerfið.
Hvernig mun íslenskum landbúnaði vegna í framtíðinni? Vel ef við pössum upp á hreinleikann og sérstöðu hans.
Hvar teljið þið að helstu tækifærin séu í útflutningi íslenskra búvara? Þar sem kaupmáttur er mikill.
Hvað er alltaf til í ísskápnum? Mjólk, grænmeti og ostur.
Hver er vinsælasti maturinn á heimilinu? Lambakjöt í brúnni sósu.
Eftirminnilegasta atvikið við bústörfin? Þegar tekið var fé aftur eftir riðuniðurskurð. Vorum eitt sinn í loðdýraræktinni og höfum alltaf séð pínulítið eftir minknum og snjóaveturinn 1995 gleymist aldrei.
