Bændurnir á Stóru- Mörk verðlaunaðir
Aðalbjörg Ásgeirsdóttir og Eyvindur Ágústsson, bændurnir á Stóru-Mörk undir Eyjafjöllum, hlutu landbúnaðarverðlaunin árið 2024.
Verðlaunin hljóta þau fyrir framúrskarandi árangur við innleiðingu loftslagsvænna búskaparhátta. Katrín Jakobsdóttir, forsætisráðherra og starfandi matvælaráðherra, afhenti þeim viðurkenningu í tilefni af því á Búnaðarþingi.
Þau hafa verið þátttakendur í verkefninu Loftslagsvænn landbúnaður frá árinu 2020. Þau hafa meðal annars unnið markvisst að því að minnka notkun tilbúins áburðar án þess að það komi niður á magni og gæðum uppskeru. Það hafa þau gert með markvissri endurræktun túna, réttum sláttutíma og með því að sá niturbindandi fóðursmára með öðrum grastegundum. Þau stunda öflugt landgræðslustarf á illa grónu landi og er markmið þeirra að endurheimta birkiskóg á Merkurnesi. Aðalbjörg og Eyvindur, ásamt foreldrum Aðalbjargar, hlutu landgræðsluverðlaunin árið 2021.
Aðalbjörg og Eyvindur hafa verið í búskap á Stóru-Mörk frá 2010 þar sem þau eru með rúmlega hundrað og tuttugu kýr og framleiða þau tæpa milljón lítra mjólkur á ári. Kýrnar þeirra voru með hæstu meðalafurðir á landinu í fyrra, eða 8.903 kílógrömm mjólkur eftir hverja árskú. Þar að auki eru þau með nautgripi til kjötframleiðslu, sauðfé og stunda ferðaþjónustu.
Verðlaunagripurinn sem þau Aðalbjörg og Eyvindur hlutu er eftir Matthías Rúnar Sigurðsson myndhöggvara og ber heitið þykkblöðungur. Verkið er höggið úr íslensku grágrýti sem á uppruna sinn að rekja til vesturbæjar Reykjavíkur.
Þessi frétt er leiðrétt útgáfa á frétt sem birtist upphaflega í prentútgáfu Bændablaðsins 21. mars síðastliðinn.
