Bæjarstjórinn gangna- og réttastjóri
Á fjallskilaseðli Ísafjarðarbæjar má sjá að gangna- og réttastjórinn á svæði í Dýrafirði sem nær frá Fjallaskaga að Alviðru er Sigríður Júlía Brynleifsdóttir, sem jafnframt er bæjarstjóri sveitarfélagsins.
„Þetta kemur til af því að það vantar fólk,“ segir Sigríður aðspurð um málið. Forveri hennar gegndi þessari stöðu áður og samkvæmt hennar bestu vitund er þetta þriðja árið þar sem þetta hlutverk fellur í hendur bæjarstjórans.
„Það fylgja því auðvitað miklar áskoranir að smala stór og dreifbýl svæði. Hérna fyrir vestan eru margir bændur sem þurfa að taka allt að fimmtán daga í smalamennskur,“ segir hún. Sauðfjárbændum hafi fækkað og því þurfi hver og einn að sinna miklu landflæmi. Hún telur að með þessu áframhaldi geti þurft að horfa á hvaða leiðir geti einfaldað hlutina í smalamennskum. „Flestir bændur á Vestfjörðum eru að reiða sig á utanaðkomandi aðstoð við smölun og eru mörg önnur svæði á landinu í sömu sporum.“
Fjallshlíðin innan við Fjallaskaga er mjög erfið yfirferðar og gerir Sigríður ráð fyrir að samið verði við Björgunarsveit Þingeyrar um að smala. Fyrri leitir verða helgina 20. og 21. september og segir Sigríður ekki ósennilegt að hún verði á svæðinu, þó hún geri ekki ráð fyrir að taka með sér talstöð til að segja gangnamönnum fyrir verkum.
„Mér finnst þetta mjög virðulegt heiti,“ segir Sigríður aðspurð um hvernig það leggist í hana að bera þennan titil, en ekki sé sjálfsagt að hlutverkið falli aftur í hennar skaut. „Við erum að sigla inn í kosningavetur og það verður kosið næsta vor. Þá kemur í ljós hvernig framhaldið verður.“
