Bæjarskilti fyrir neðan Kambana
Hveragerðisbær vinnur að því að setja upp stórt bæjarskilti fyrir neðan Kambana en á þessu ári fagnar bærinn áttatíu ára afmæli.
„Mér líst frábærlega á þetta verkefni, hér verður okkur allt að góðu þessa dagana. Það hefur lengi staðið til að setja upp skilti við bæjarmörk Hveragerðis, bæði í Kömbunum og austan við bæinn í grennd við afleggjarann að Gljúfraholti. Nú klárum við það með krafti. Hveragerðisbær fagnar á árinu 80 ára afmæli og það er viðeigandi tímapunktur til að setja upp vegleg skilti við bæjarmörkin,“ segir Pétur Georg Markan, bæjarstjóri Hvergerðisbæjar, aðspurður hvernig honum lítist á nýju bæjarskiltin, sem stendur til að setja upp á næstunni.
„Við lögðum upp með að fanga einstakan staðaranda Hveragerðisbæjar í skiltunum og fengum því heimafólk í að hanna skiltið. Efniviðurinn í skiltinu verður af gæðum, náttúrulegur og blómlegur í anda blómabæjarins Hveragerðis. Skiltin verða 3 metrar á breidd og 4 metrar á hæð. Við byrjum á að setja upp skilti í Kömbunum. Svo er ráðgert að setja sams konar skilti við austurenda bæjarins og við endum síðan á að setja upp skilti á suðurmörkum bæjarins á Þorlákshafnarvegi en það verður aðeins seinna,“ bætir Pétur við.
En mun svona skilti skila sér í aukinni aðsókn íbúa í bæjarfélagið, eða hvað? „Aðsókn í bæinn er mjög vaxandi, hvort sem það eru íbúar eða gestir. Hér er ferðaþjónustan í mikilli uppsveiflu, eins og framkvæmdir uppi í Reykjadal bera með sér. Í grunninn má segja að þetta sé upplýsingaskilti, sem lætur vegfarendur vita að þeir séu komnir á fallegan stað í einstakt umhverfi Hveragerðisbæjar,“ segir Pétur bæjarstjóri.
