Báðar tóku bleikjurnar Krókinn
Höfundur: Gunnar Bender
,,Ég skrapp á Vestfirði á dögunum og veiddi nokkur af þeim svæðum sem eru inni á Veiðikortinu,“ sagði Ólafur Tómas Guðbjartsson í samtali en hann er duglegur að koma sér að veiða víða um landið og renna fyrir fisk. ,,Af þeim svæðum sem ég fór á voru það kannski tvö sem stóðu upp úr, ekki bara veiðilega, heldur hvað fegurð varðar.
Fyrst ber að nefna Vatnsdalsvatn í Vatnsfirði. Þangað hef ég reyndar komið nokkrum sinnum og er alltaf jafn ánægður með ferðina. Í þetta sinn veiddi ég þar sem Vatnsdalsáin efri rennur í vatnið sjálft, en þar myndast tveir taumar langt út í vatn. Bleikjan heldur sig við enda þeirra og kemur síðan ofar í hvorn straumtauminn er nær dregur kvöldi. Ég lét mér nægja að hirða tvær bleikjur af veiðinni þar. Báðar fallegar staðbundnar í stærðunum 48 cm og 50 cm. En því miður kom það síðan í ljós að þær voru báðar illa farnar af bandormi og komnar með samgróinn maga. Ég varð ekki var við að mikið af sjóbleikju væri komin inn, en ég staldraði þó stutt við,“ sagði Ólafur Tómas.
Sauðlauksvatn með þeim skemmtilegri
„Því næst ber að nefna Sauðlauksdalsvatn. Vatnið er eitt af þeim skemmtilegri sem ég hef veitt. Harður gulur sandbotn alla leið að dýptarskilum og virkilega sprækur fiskur. Ég veiddi þangað til mér fannst ég hafa veitt nóg, enda hentar vatnið kannski ekki vel til þess að veiða og sleppa, þar sem fiskurinn, bæði urriðinn og bleikjan, keyrðu sig gjörsamlega út í bardögunum. Ég sá einn sjóbirting stökkva þar, sem var gaman, þó ég hafi ekki fengið hann til þess að taka.
En Vestfirðir, sá hluti sem ég heimsótti, er kannski svæði sem maður gleymir oft þegar kemur að fínustu svæðum til veiða. Þarna eru fjölmörg vötn, bæði innan Veiðikortsins sem og utan þess og náttúrufegurðin einstök.“
Meðfylgjandi mynd er af bleikjunum í Vatnsdalnum. „Ég notaði kajakinn aðeins til þess að dóla mér um vatnið, en veiddi bleikjurnar frá landi. Báðar tóku þær fluguna Krókinn nr. 14 andstreymis,“ sagði Ólafur í lokin.
