Arnheiðarstaðir

Arnheiðarstaðir er gömul landnámsjörð að talið er og þar að auki gömul kristfjárjörð sem ábúendur jarðarinnar keyptu árið 2002. Foreldrar Eiríks, núverandi ábúanda, þau Jón E. Kjerúlf og Guðrún Einarsdóttir, bjuggu þá á jörðinni. Eiríkur tekur við búinu árið 2005, en síðar rugla þau Eiríkur og Matthildur saman reitum og árið 2010 kemur hún í búskapinn.

Árið 1991 voru byggð ný fjárhús fyrir 300 fjár en þá voru fyrir gömul fjárhús sem voru rifin vegna allsherjar riðuniðurskurðar á svæðinu. Árið 1999 var byggt nýtt íbúðarhús og flutt í það árið 2000. Árið 2006–2007 var byggð rúlluaðstaða og fjárhús fyrir 200 fjár. Árið 2012 og 2013 var svo mokað út úr 300 kinda fjárhúsinu – sem var taðhús og steyptur kjallari – og smíðaðar grindur.

Býli: Arnheiðarstaðir.

Staðsett í sveit: Fljótsdalur á Héraði.

Ábúendur: Eiríkur J. Kjerúlf og Matthildur Erla Þórðardóttir.

Fjölskyldustærð (og gæludýra): Eiríkur og Matthildur. Matthildur á tvö uppkomin börn; Þórarin Pál Andrésson, 30 ára, bóndi á Fljótsbakka í Eiðaþinghá, og Birna Sólrún Andrésdóttir, 27 ára, bóndi á Skipanesi í Hvalfjarðarsveit. Á hún líka ótrúlegan fjölda af barnabörnum. Svo eru smalatíkurnar Katla og Týra, og veiðikötturinn Pjakkur.

Stærð jarðar? Eitthvað í kringum 3.000 ha.

Gerð bús? Sauðfjárbúskapur og 25 ha skógrækt.

Fjöldi búfjár og tegundir? 436 vetrarfóðraðar kindur, sex hestar notaðir við smalamennskur og svo níu íslenskar varphænur.

Hvernig gengur hefðbundinn vinnudagur fyrir sig á bænum? Misjafnt eftir árstíðum. Fénu gefið tvisvar á dag allan veturinn, sólarhringsvakt allan sauðburðinn. Mislangir dagar við smalamennskur og heyskap. Frá miðjum nóvember fram í miðjan apríl vinnur Eiríkur hjá Skógrækt ríkisins á Hallormsstað við skógarhögg og ýmislegt annað. Matthildur sér um búið á meðan.

Skemmtilegustu/leiðinlegustu bústörfin? Öll störf eru skemmtileg, kannski misskemmtileg.

Hvernig sjáið þið búskapinn fyrir ykkur á jörðinni eftir fimm ár? Svipaðan, en vonandi með betri afkomu.

Hvaða skoðun hafið þið á félagsmálum bænda? Við höldum og vonum að allir séu að gera sitt besta eins og hægt er. En þetta er ekki alltaf þægileg staða að vera í forsvari fyrir bændur þegar lítils skilnings gætir hjá ráðamönnum þjóðarinnar.

Hvernig mun íslenskum landbúnaði vegna í framtíðinni? Vel, ef rétt er haldið á spilunum.

Hvar teljið þið að helstu tækifærin séu í útflutningi íslenskra búvara? Í kjöti og mjólkurvörum.

Hvað er alltaf til í ísskápnum? Mjólk, egg, ostur, kæfa, smjör, sulta og slátur.

Hver er vinsælasti maturinn á heimilinu? Steikt kindalæri, eða bógur, með brúnni sósu, rabarbarasultu og ora grænum baunum.

Eftirminnilegasta atvikið við bústörfin? Þegar flutt var í nýja íbúðarhúsið árið 2000, og þegar taðfjárhúsunum var breytt í grindahús.