Árið í myndum
Nýliðið ár bar margt merkilegt í skauti sér og fréttaefni voru ærin. Hér er sýnishorn af forsíðuljósmyndum Bændablaðsins árið 2023 og sýna þær að einhverju leyti hvar þunginn lá í umfjöllun á hverjum tíma.
Þeir eru að eigin sögn hvatvísir bræður úr Kópavogi sem hafa engan bakgrunn í garðyrkju. Þeir eru þó „þokkalega“ framkvæmdaglaðir og tóku upp á því að kaupa sér garðyrkjustöð fyrir fjórum árum. Seinna keyptu þeir fyrirtæki sem framleiðir sprettur og síðan fylgdu kaup á annarri veglegri garðyrkjustöð. Í dag eru þeir Pétur Haukur og Ágúst Loftssynir meðal stærstu salatframleiðenda landsins.
13. tbl. 6. júlí. Mynd / Karl Ólafsson
Eydís Anna Kristófersdóttir og Steinþór Logi Arnarson með níu mánaða soninn Kristófer Loga. Þau tóku formlega við búskapnum á Stórholti í Dalabyggð snemma á síðasta ári af foreldrum Steinþórs. Steinþór hefur gegnt formennsku í Samtökum ungra bænda í rúmt ár og er það hans mat að íslenskur landbúnaður standi á tímamótum. Það sé ekkert sjálfsagt mál að kynslóðaskipti eða nýliðun eigi sér stað þegar afurðaverð er ekki nógu hátt, vextir á lánum séu himinháir og verð á aðföngum í hæstu hæðum. Skýr skilaboð til framtíðar verði að koma sem fyrst frá stjórnvöldum.9. tbl.
11. maí. Mynd / Sigurður Már Harðarson
Hjörtur Logi Birgisson, bóndasonur á bænum Flatey á Mýrum í Hornafirði, var vel tækjum búinn fyrir kornuppskeru ársins. Á Flatey er risin kornþurrkstöð sem framleiddi um 500 tonn af þurru byggi í vor. Stöðin er vísir að fyrsta kornsamlagi landsins.
19. tbl. 19. október. Mynd / Vilborg Rún Guðmundsdóttir
Litlir og stórir – en allir knáir! Díana Rós Þrastardóttir, bóndi og bókari á Þórustöðum, með dótturina Heklu Lind Jónsdóttur. Í baksýn er stærsta og öflugasta kartöfluupptökuvél landsins og Jón Helgi Helgason, eiginmaður Díönu, rabbar við gest um kartöflubúskapinn. Þótt bjart sé yfir mannskapnum er búskapurinn bændum þungur í skauti og blikur á lofti.
20. tbl. 2. nóvember. Mynd / Steinunn Ásmundsdóttir
Vikugamlir kjúklingar í uppeldi á Lambhaga í Ölfusi. Þrjú fyrirtæki standa að allri alifuglaframleiðslu hér á landi, á rúmlega 30 stöðum kringum landið. Umfang framleiðslunnar telur um 6 milljónir fugla á ári. Framleiðslan nam um 9.500 tonnum í fyrra.
Kolefnisspor íslenskra kjúklinga er minna en flestra annarra dýrategunda til manneldis og kolefnisspor íslenskrar kjúklingaframleiðslu er langt fyrir neðan heimsmeðaltal. Allur úrgangur, eða hráefni, sem ekki er nýtt til manneldis, er notað sem áburður eða til landgræðslu.
7. tbl. 4. apríl. Mynd / Guðrún Hulda Pálsdóttir
Heimsmeistaramót íslenska hestsins fór fram í Hollandi í byrjun ágúst. Þar náði íslenska landsliðið sögulegum árangri og vann til 16 gullverðlauna og 5 silfurverðlauna. Hér fara þeir Elvar Þormarsson á Fjalladís frá Fornusöndum og Daníel Gunnarsson á Einingu frá Einhamri II sigursprettinn í 250 m skeiði þar sem Elvar á Fjalladís varð heimsmeistari í greininni og Daníel á Einingu lenti í öðru sæti.
15. tbl. 24. ágúst. Mynd / Krijn Buijtelaar
Hjónin Jóhann Pjetur Jónsson og Harpa Jóhanna Reynisdóttir eru ráðin af Vegagerðinni til að smala umferðarþyngstu þjóðvegina frá Hvalfjarðargöngum að Holtavörðuheiði til að fækka slysum. Vegna umferðarþunga þurfa þau að sinna starfinu í skjóli nætur.
16. tbl. 7. september. Mynd / Ástvaldur Lárusson
Björgvin Þór Harðarson, svínabóndi í Laxárdal, hefur þurft að byggja og breyta miklu á búi fjölskyldu sinnar undanfarin misseri. Svínarækt er búgrein sem stendur á tímamótum þar sem ný reglugerð um aðbúnað tekur gildi eftir tvö ár.
Með því munu íslenskir svínabændur vera í fararbroddi á heimsvísu hvað dýravelferð varðar.
2. tbl. 26. janúar. Mynd / Ástvaldur Lárusson
