Annað innbrot í svínabú Stjörnugríss
Annað innbrot átti sér stað í morgun þegar að svínum Stjörnugríss var sleppt út í Saltvík, lögreglan er með málið til rannsóknar. Fimm smágrísir drápust og ein gylta fótbrotnaði sem þurfti að aflífa.
Verksummerki voru með svipuðum hætti og í fyrra innbrotinu en nú var rúða brotin og farið inn um glugga. Innréttingar voru aftur rifnar upp og stíur og hurðir opnaðar. Dýrin gengu því laus um húsið og komust út á tún við búið. Málið hefur verið kært til lögreglu og er til rannsóknar. Matvælastofnun og embætti yfirdýralæknis hafa einnig verið upplýst um atvikið.
Aftur eru afleiðingar innbrotsins alvarlegar fyrir dýrin, auk þeirra sem drápust eru fjölmörg dýr særð og með áverka og voru sóttvarnir búsins rofnar. Líkt og eftir síðasta innbrot má búast við frekari afleiðingum á næstu dögum og vikum, meðal annars vegna streitu, líkt og minnkaðri mjólkurframleiðslu hjá gyltum og mögulegum fósturlátum.
„Okkur er mjög brugðið yfir því að þetta skuli hafa endurtekið sig, sérstaklega í ljósi þess hversu alvarlegar afleiðingar fyrra innbrotið hafði fyrir velferð dýranna,“ segir Geir Gunnar Geirsson, forstjóri Stjörnugríss, í samtali við blaðið. „Við byrjuðum daginn náttúrulega á því að koma öllum svínunum inn, koma öllu á sinn stað og gera við skemmdir eins og síðast. Í dag voru átta dýr komin út. Fimm smágrísir dóu og við þurftum að aflífa eina gyltu sem fótbrotnaði svo mun koma í ljós á næstu dögum hvaða áhrif þetta mun hafa á dýrin, síðast urðu sjö fósturlát.“
Geir segir að síðast hafi hann talið að þarna væri einhver á ferð sem gerði sér ekki grein fyrir afleiðingum gjörða sinna en að endurtekið innbrot á svínabúið, auk þeirra innbrota sem áttu sér stað á Reykjabúinu og Dalsbúi gæfu til kynna að innbrotin væru þaulskipulögð. „Ég tel ljóst að þessar aðgerðir hafa snúist upp í andhverfi sína, þær virðast ekkert hafa með umhyggju fyrir dýrum eða dýravelferð að gera“.
Geir biður þá sem stóðu að verknaðinum að gefa sig fram og axla ábyrgð á gjörðum sínum og biður alla sem kunna að hafa upplýsingar um málið að hafa samband við lögreglu þar sem innbrotin hafa haft mjög alvarleg áhrif fyrir dýrin.
