Andleg heilsa bænda kortlögð
Sautján prósent sænskra bænda sem starfa að öllu leyti innan bús eru með einkenni þunglyndis.
Þetta kemur fram í fyrstu stóru rannsókninni á andlegri heilsu sænsku bændastéttarinnar.
Peter Lundquist hjá Landbúnaðarháskóla Svíðþjóðar sem leiddi ransóknina, segir bændur almennt vinna of mikið og ekki hafa tíma til að hvíla sig. Arðsemi búanna hefur áhrif, en þar sem reksturinn gengur betur hafa bændur frekar möguleika á að ráða inn starfskraft til að minnka álagið. Frá þessu greinir Land Lantbruk.
Karlmenn yfir fimmtugu er sá hópur í bændastéttinni sem líður best, á meðan ungar konur í mjólkurframleiðslu hafa það verst. Ellefu prósent bænda hafa upplifað að lífið sé ekki þess virði að lifa því og hefur átta prósent bænda íhugað alvarlega að svipta sig lífi einhvern tímann á sínum starfsferli. Í Svíþjóð er ekki til tölfræði sem tengir saman sjálfsmorðstíðni við starfsstéttir en í einstaka erlendum rannsóknum hafa komið fram auknar líkur á sjálfsmorðum hjá bændum í samanburði við aðrar vinnandi stéttir.
Í rannsókninni kemur fram að margir bændur finna fyrir líkamlegum verkjum, sem eykur hættuna á slæmri andlegri líðan, sérstaklega þegar þeir eru undir miklu verkefnaálagi. Hluti þátttakenda í rannsókninni sagðist upplifa skilningsleysi meðal maka og fjölskyldu. Jafnframt geta verið árekstrar milli ólíkra kynslóða eða systkina. Margir utanaðkomandi þættir sem bændur geta ekki stjórnað auka andlegt álag, svo sem óhagstætt veður, háir vextir, krafa eftirlitsaðila um endurbætur og fleira.
Lundquist segir mestu máli skipta að bændastéttin spyrji sjálf spurninga um andlega líðan og hvernig hægt sé að bæta hana. Í gegnum tíðina hefur þetta viðfangsefni ekki mætt miklum áhuga meðal bænda eða innan þeirra félagskerfis. Hann vonast til að með aukinni þekkingu sé hægt að fyrirbyggja vandann.
