Allt sem margir þurfa

Bændablaðið fékk til prufu nýjasta útspil indverska dráttarvélaframleiðandans Solis, sem er fullvaxinn níutíu hestafla traktor sem kæmi til greina við landbúnaðarstörf. Hér er komið gerðarlegt tæki sem ætti að ráða við flest verk og er án flókins tölvubúnaðar.

Framleiðandinn hefur greinilega lagst í mikla vinnu þegar kemur að hönnun á ytra útliti 90 XL, því nú er loksins komin Solis dráttarvél sem er sannarlega aðlaðandi. Þegar traktorinn er skoðaður að utan er ekkert sem gefur til kynna að hér sé um ódýra vél að ræða. Þessi tiltekni traktor er blár að lit, þó Solis traktorar hafi sést í öðrum litum, eins og svörtum. Þá eru felgurnar kolsvartar sem er ekki algengt í heimi dráttarvéla.

Lítill en ekki agnarsmár

Eitt helsta einkenni Solis 90 XL er hversu lítill hann er. Þetta er alls ekki smátraktor eins og sveitarfélög nota í snjómokstur á gangstéttum, heldur er hann frekar á stærð við þær hefðbundnu 80 til 90 hestafla dráttarvélar sem voru algengar í kringum aldamótin.

Helsti aukahluturinn á vélinni sem blaðamaður fékk að reyna voru ámoksturstæki að framan. Vallarbraut mun flytja þessa traktora inn með tveimur dekkjastærðum og var vélin í þessum prufuakstri á þeim stærri. Þau eru frá framleiðandanum BTK, sem hefur getið sér gott orðspor. Þá er búnaðurinn að aftan ósköp hefðbundinn. Þessi vél er ekki útbúin útskjótanlegum krók, þó það sé aukabúnaður sem stendur til boða. Heldur er vélin með svokallaðan þýskan krók sem situr ofar ásamt einföldu vagnabeisli neðst sem auðvelt er að fjarlægja. Þá eru þrjár vökvasneiðar og þrítengibeisli með opnum beislisendum ásamt úrtaki fyrir vagnbremsur. Það helsta sem vantar eru takkar á brettunum til að stjórna aflúrtaki og hæð beislisins.

Allt mekanískt

Hið hagstæða verð vélarinnar skilst ágætlega þegar stigið er um borð. Umhverfið er hrátt og einkennist af þykku og gráu plasti, stöngum með björtum litum og tökkum sem gerðir eru fyrir mikla vinnu. Fyrir utan útvarp, loftkælingu og sæti á gormafjöðrun er ekkert sem hægt er að telja sem lúxus. Þá er ökumannshúsið það lítið að ekki er hægt að koma fyrir farþega.

Þrengslin finnast þegar gengið er inn og út úr vélinni, en beint fyrir innan dyrnar er stöng fyrir aflúrtakshraðann og andspænis henni er stöngin fyrir vendigírinn. Auðvelt er að reka sig í þær, sérstaklega ef stýrinu hefur ekki verið ýtt upp.

Þegar kemur að notandanum er enginn tölvubúnaður inni í vélinni, fyrir utan litla aksturstölvu í mælaborðinu. Hér er öllu stjórnað með mekanískum stöngum eða einföldum on/off rofum. Þeir sem hafa kynnst tækjum frá gamalli tíð ættu að rata um þetta umhverfi án mikillar umhugsunar.

Vökvasneiðarnar að aftan eru allar stangarstýrðar og kemur rafmagn ekkert þar við sögu. Stýripinninn fyrir ámoksturstækin er barkastýrður og með hnappa til að virkja þriðja sviðið. Stöngin er stíf og staðsett nokkuð langt frá ökumanninum og má því reikna með að hægri höndin verði þreytt eftir langa notkun.

Einfaldur vendigír

Solis 90 XL er með vendigír við stýrið sem er ekki kúplingsfrír. Til að skaða ekki gírkassann þarf vélin að vera svo gott sem kyrr áður en skipt er um akstursstefnu. Stöngin er staðsett heldur langt frá ökumanninum, sérstaklega ef sætið er aftarlega, en þá þarf að teygja sig nokkuð til að venda stönginni fram. Allt virkar þetta samt eins og það á að gera. Notkunin á gírkassanum er ekki ólík því sem fylgir að keyra beinskiptan fólksbíl, en til að skipta um gír þarf að stíga á kúplinguna og hreyfa gírstöng. Aðalgírarnir eru fjórir, en með annarri stöng er hægt að velja hátt, miðlungs eða lágt drif. Í fyrsta gír í lága drifinu hreyfist vélin varla, en samkvæmt framleiðanda er lágmarkshraðinn 1,22 kílómetrar á klukkustund.

Svart tauáklæði er á sætinu og armpúðar beggja vegna. Fyrir utan að bjóða upp á nokkrar grunnstillingar, þá myndi sætið teljast afar einfalt. Í þann stutta tíma sem undirritaður sat í þessu sæti var ekkert sem gaf til kynna annað en að það væri þægilegt, fyrir utan einfaldan fjöðrunarbúnaðinn.

Hér er á ferðinni gormafjöðrun og virknin því ekki eins fáguð og loftpúðafjöðrun í dýrari sætum. Það er eflaust hægt að fínstilla sætið eitthvað, en þeim sem þetta ritar fannst hreyfingar þess full kvikar, sérstaklega þegar ekið var á hámarkshraða (rúmlega 30 kílómetrar á klukkustund) á holóttum vegi.

Engin fjöðrun er á vélinni og finnst það í akstri. Við eitt tilfelli í þessum prufuakstri lyftist ökumaðurinn úr sætinu þegar ekið var ofan í djúpa holu á miklum hraða. Því er ekki hægt að gera væntingar til þess að geta brunað yfir ójöfnur á þessum traktor án mikils hamagangs.

Takmörkuð hljóðeinangrun

Annað atriði sem hugsanlegir kaupendur Solis 90 XL þurfa að hafa í huga er að hljóðeinangrunin er merkjanlega minni en á stærri og dýrari dráttarvélum. Vélar- og dekkjahljóð berst býsna vel inn í ökumannshúsið, en það ætti ekki að skipta miklu máli ef unnið er í styttri lotum. Standi til að fara í harða vinnu í lengri tíma gæti Peltorinn komið í veg fyrir þreytu í eyrunum.

Útsýnið fram fyrir húddið er prýðilegt og er lítið mál að átta sig á hvað er í gangi þegar ámoksturstækin eru í lægstu stöðu. Öðru gegnir þegar ámoksturstækjunum er lyft alla leið upp í topp, en þá þarf að beygja sig nokkuð fram til að fá þau í sjónlínu. Annars eru gluggabogarnir þunnir og er lítið um blinda punkta.

Niðurstaða

Þeir sem lesa þennan dóm gætu álitið að undirritaður hafi ekki kunnað að meta Solis 90 XL. Því fer hins vegar fjarri lagi, því þetta er mikilhæfur traktor sem er uppfullur af karakter og vegna hins hagstæða verðs er auðvelt að fyrirgefa gallana. Ekki skemmir fyrir að dráttarvélin kemur með fimm ára verksmiðjuábyrgð. Þeir sem þurfa að sitja heilu dægrin í traktor við mikla vinnu ættu kannski að skoða aðra kosti, en fyrir alla aðra er þetta hið fínasta tæki með öllum þeim búnaði sem dráttarvélar þurfa til að sinna sínum helstu skyldum.

Vélin í þessum prufuakstri er fjórhjóladrifin og með 90 hestafla, fjögurra strokka, 4.087 rúmsentímetra mótor. Helstu mál án ámoksturstækja eru: Hæð, 2.720 millímetrar; breidd, 2.050 millímetrar; lengd, 4.205 millímetrar. Eigin þyngd er 4.035 kílógrömm. Umrædd vél með ámoksturstækjum og skóflum fæst á 7.980.000 krónur (öll verð án vsk.) hjá Vallarbraut ehf. í Hafnarfirði. Bændablaðið gerði örlitla verðkönnun hjá öðrum vélasölum og virðast sambærilegir traktorar frá þekktari dráttarvélaframleiðendum kosta í kringum níu milljónir króna. Ódýrasta útgáfan á Solis 90 XL án ámoksturstækja er á 6.700.000.