Áfram sömu forsendur í innlausnarmarkaði sauðfjár

Opnað hefur verið fyrir tilboð um kaup og sölu greiðslumarks í sauðfé.

Innlausnarmarkaður fyrir greiðslumark sauðfjár verður haldinn í nóvember. Innlausnarverð er núvirt andvirði beingreiðslna eins árs, 5.610 kr. pr. ærgildi. Það greiðslumark sem er innleyst er jafnframt boðið til sölu á innlausnarverði. Þetta kemur fram í tilkynningu frá atvinnuvegaráðuneyti.

Framleiðendur sem eiga 100 kindur eða fleiri og eru með ásetningshlutfallið 1,0 eða hærra skulu hafa forgang að öllu greiðslumarki sem er í boði á markaði. Það skiptist hlutfallslega milli aðila sem hljóta forgang í samræmi við það magn sem þeir óskuðu eftir að kaupa.

Hver framleiðandi getur ekki óskað eftir ærgildum umfram þau sem tryggja honum óskertar beingreiðslur í samræmi við fjárfjölda og ásetningshlutfall. Framleiðandi í forgangshóp getur ekki fengið hærri úthlutun ærgilda en sem nemur því að ásetningshlutfall eftir úthlutun fari niður í 1,0. Það greiðslumark sem ekki er úthlutað til framleiðenda í forgangshópi skal boðið öðrum umsækjendum.

Í fyrra barst 131 umsókn um kaup og 24 umsóknir um sölu á innlausnarmarkaði fyrir 2024. Var þá óskað eftir 32 þúsund ærgildum en til ráðstöfunar voru 4.266 ærgildi. Innlausnarverð ársins jafngilti beingreiðslum næstu tveggja ára, sem voru 10.762 krónur á ærgildið. Allt greiðslumark til ráðstöfunar rann þá til forgangshópsins og voru bú með lítið greiðslumark að kaupa til að styrkja rekstrargrundvöll sinn til lengri tíma litið.

Kaupandi greiðslumarks nýtir greiðslumark frá og með 1. janúar 2026. Tilboðum um kaup og sölu greiðslumarks skal skila rafrænt á afurd.is. Opnað hefur verið fyrir tilboð. Tilboðsfrestur rennur út á miðnætti 1. nóvember nk. Greiðslufrestur vegna kaupa á greiðslumarki er til 15. desember