Af degi blánar nýjum

Vetur og vos, hálka og hlákur, byljir og barningur hafa þrengt að vegfarendum síðan í nóvember. Haustið var milt og stundum blítt, en svo fóru lægðirnar að sækja í sig veðrið. 

 

En aftur að sólunni sveigir nú heimskautið kalda og rokur undir Hafnarfjalli, á Þverárfjalli, í Víkurskarði og hvað sem þessir veðurnæmu staðir heita, þær fara að ganga í sig og ökumenn á frónskum vegum  þekkja að þrauka þarf þorrann, góu og einmánuð til hörpu og sumarkomu.

 

Gísli Ólafsson frá Eiríksstöðum kvað:

 

Dregur úr Ránar dimmum þyt,

af degi blánar nýjum.

Sveipar gljána silfurlit

svalur máni í skýjum.

 

Síðastliðið vor var kynnt í þessu blaði bænda handverks­sýning í Ártúnum, sem stóð í 17 daga og laðaði að sér 350 gesti, nokkra utan af Skaga, aðra vestan af Akranesi, sunnan af Skeiðum, austan úr Kelduhverfi og fjölmörgum bæjum öðrum. Má ætla Bændablaðið gott til kynningar en veðurguðir létu ekki heldur sitt eftir liggja og  blessuð sólin gleymdi ekki að skína í Blöndudalinn þessa daga. Húsmóðirin og handverkskonan  SÓl tók á móti gestum með kaffi og pönnukökum en börn hennar gengu með gestum um stofur hússins,  sýningarsalinn og rifjuð voru upp gömul kynni, ættvísi, sagnir og önnur fræði sem hæfðu stund og stað. Tilefni sýningar­innar var níræðis­afmæli Sigríðar á árinu og vitneskja ættingjanna um myndir hennar og handavinnu sem reyndust mun fleiri og meiri að vöxtum en nokkurn óraði fyrir. 

 

Við í Ártúna­fjölskyldunni þökkum þessum gestum góða komu og viljum senda þeim óskir um gott ár og gjöfult til drjúgra verka, hlýrra hugrenninga og góðrar heilsu.